ނޯޓް: މިއީ އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާގެ ކައުންސިލަރު ހަސަން ޝާހިދު އޭނާގެ ބްލޮގް "ވެލްކަމް ޓް ޝާހިދު ލައިވް" ގައި މެއި 22، 2013 ވަނަ ދުވަހު ޝާއިއުކޮށްފައިވާ ލިއުމެކެވެ. ކިޔުންތެރިން އިންސާފުކޮށްލައްވާށެެވެ.
—————————————————
އެއްވެސް ޝައްކެތް ނެތް ގޮތުގައި، އިސްލާމް ދީނަށް ގޮވާލުމާއި، އެދީނުގެ ދަޢުވަތު އެހެން ދީންތަކުގެ މީހުންނަށް ދިނުމަކީ އެ މީހެއްގެ ޤާބިލުކަން ހުރި މިންވަރަކުން ކުރަން ޖެހޭނެ ކަމެކެވެ. އަދި އެކަމަކީ ސަވާބުން ފުރިގެންވާ ކަމެކެވެ.
ނަމަވެސް މިއަދު ދިވެހި ރާއްޖޭގެ މުޖުތަމަޢުގައި މިފެންނަ މަންޒަރުތަކަށް ބަލާއިރު، ދީނަށް ގޮވާލުމުގެ ނަމުގައި މި ފެންނަނީ ސިޔާސީ ހަތިޔާރެއްގެ ގޮތުގައި ދީން ބޭނުން ކުރެވެމުންދާ ތަނެވެ. ތިމާ އާ އިދިކޮޅު ސިޔާސީ ފިކުރެއް ގެންގުޅޭ ކޮންމެ މީހަކާ ދިމާލަށް ލާދީނީ މީހެކޭ ބުނެ ލޭބަލް ކުރަމުންދާ މަންޒަރެވެ. ސިޔާސީ މީހުންނާ ޗެލެންޖް ކުރުމުގެ ގޮތުން އޮރިޔާންކޮށްލާނަމޭ ބުނެ، ބޮޑާވެ ގަންނަ މަންޒަރެވެ.
މާތްﷲ ކީރިތި ޤުރުއާނުގައި ވަހީ ކުރައްވާފައިވާ ބަސްފުޅުގެ މާނައިގައި ވަނީ: "ޙިކުމަތާއި ރިވެތި ވައުޘާއެކު، ކަލޭގެފާނުގެ ވެރި ރަސްކަލާނގެ މަގަށް، ކަލޭގެފާނު ގޮވައި ލައްވާށެވެ! އަދި ރިވެތި ގޮތުގައި އެއުރެންނާއި ޖަދަލު ކުރައްވާށެވެ! ހަމަ ކަށަވަރުން ކަލޭގެފާނުގެ ވެރި ރަސްކަލާނގެ، އެކަލާނގެ މަގުން އެއްކިބާވެގެންވާ މީހުން މޮޅަށް ދެނެވޮޑިގެންވެއެވެ! އަދި ތެދުމަގު ލިބިގެންވާ މީހުންވެސް މޮޅަށް ދެނެވޮޑިގެންވަނީ އެކަލާނގެ އެވެ."
މާތްﷲ ގެ މިބަސްފުޅާއި އެއްގޮތަށް ދީނަށް ގޮވާލާ މީހާގެ ކިބައި ހުންނަންޖެހޭ މުހިއް ސިފަތަކެއްވެއެވެ. އިލްމާއި ފިޤުހު އުނގެނިގެން ނޫނީ ރިވެތި ވައުޡާއެކު ނަސޭހަތްތެރި ނުވެވޭނެ އެވެ. ހަމައެހެންމެ ކެތްތެރިކަމާއި ތަހައްމަލު ކުރުމާއި، މަޑުމޮޅި ކަމުގެ ސިފަ ލިބިގެން ނޫނީ ހިކުމަތްތެރިކަމާއެކު މާތް ﷲ އަންގަވާފައިވާ ގޮތައް ދީނަށް ގޮވާ ނުލެވޭނެ އެވެ.
މި ޒަމާނަކީ އިންޓަނެޓުގެ ޒަރިއްޔާއިން މުޅި ދުނިޔެ ކޮމްޕިއުޓަރުގެ ސްކްރީނަށް ލެވޭ ޒަމާންކަމުން، އިންޓަނެޓްގެ ޒަރިއްޔާއިން ދީނަށް ގޮވައިލުން މިވަނީ ވަރަށް ފުޅާވެފައެވެ. ދިވެހިރާއްޖެއަކީ %100 މުސްލިމް ގައުމެއް ކަމަށް ވިޔަސް، މިއަދު މިރާއްޖޭގައި ކުރެވޭ އެއްމެ ބޮޑު އެއް ކެމްޕޭނަކީ، ދީނަށް ގޮވާލުމާއި ދީން ހިމާޔަތް ކުރުމުގެ ކެމްޕޭނެވެ.
ވަކީން ޚާއްސަކޮށް އިންޓަނެޓްގައި މިކެމްޕެއިން ފެތުރިފައި ވަނީ އާދަޔާ ޚިލާފު މިންވަރަކަށެވެ. ނަމަވެސް މިއަދު ކޮށްލަންޖެހޭ ސުވާލަކީ ދިވެ ރާއްޖޭގައި އިންޓަނެޓްގެ ޒަރިއްޔާއިން މިކުރެވޭ ކެމްޕޭންތަކުން ނިކުންނަ ނަތީޖާއަކީ ކޮބައިތޯ އެވެ؟
އަޅުގަނޑަށް ފެންނަ ފެނުމުގައި، ދީނަށް ގޮވާލެއްވުމުގެ ނަމުގައި، އަޅުގަނޑުމެންނަށް މިކުރެވޭ ކަމަކީ، އަޅުގަނޑުމެންގެ ހިތުގެ ޒާތީ ހަސަދަ އަނެކާއަށް ފިލުވާލުމެވެ. ދީނަށް ގޮވާލުމުގެ ނަމުގައި، އަޅުގަނޑުމެން މި ކުރާކަމަކީ، މުޖުތަމައު ފަސާދަ ކުރުމެވެ.
ނޯޓް: އަޅުގަނޑު ލިޔާ ކޮންމެ އެއްޗެއް އެއްމެނަށް ކަމުދާކަށް ނުޖެހެއެވެ.