ޔޫރަޕުގައި ކުޅޭ 21 އަހަރުން ދަށުގެ ކުޅުންތެރިންގެ ތެރެއިން އެންމެ މޮޅު ކުޅުންތެރިޔާ އަށް އިޓަލީގެ ނޫހެއްކަމަށްވާ ޓުޓޯސްޕޯޓް އިން ދޭ ގޯލްޑަން ބޯއީ އެވޯޑް ނެދަލޭންޑްސް އަދި އަޔެކްސް އެމްސްޓެޑަމްގެ ޒުވާން ޑިފެންޑަރު މަތައިސް ޑި ލައިޓް ކާމިޔާބުކޮށްފިއެވެ.
ނިމިދިޔަ އަހަރުގެ އެވޯޑް ފްރާންސްގެ ކިލިއަން އެމްބާޕޭ އަށް ލިބުނުއިރު، މިފަހަރުގެ އެވޯޑް ޑި ލައިޓް ހާސިލްކުރީ ލިވަޕޫލަށް ކުޅޭ އިންގްލެންޑްގެ ޒުވާން ފުލްބެކް ޓްރެންޓް އަލެކްސެންޑާ އާނޯލްޑް ފަހަތަށް ޖައްސާލުމަށްފަހުއެވެ.
ދުނިޔޭގެ އެކި ހިސާބުތަކުން ކުޅިވަރުގެ ޖާނަލިސްޓުން ވޯޓު ދޭ މި އެވޯޑްގެ ނަތީޖާ އިޓަލީގެ ޓުޓޯސްޕޯޓް ނޫހުން އިއްޔެ ހާމަކޮށްފައިވާއިރު، ޑި ލައިޓް އަށް ލިބުނީ 224 ވޯޓެވެ. އަލެކްސެންޑާ އާނޯލްޑް އަށް 149 ވޯޓު ލިބުނުއިރު، ތިންވަނަ އަށް ދިޔަ ހޮލެންޑްގެ ޖަސްޓިން ކްލައިވަޓް އަށް ލިބުނީ 101 ވޯޓެވެ.
"މި އެވޯޑް ލިބުމުން އަހަރެން ވަރަށް އުފާވޭ. މީގެކުރީން މި އެވޯޑް ހާސިލްކުރި ފަރާތްތަކަށް ބަލާލުމުން ވެސް އަހަރެންނަށް މި އެވޯޑް ލިބުމުން ވަރަށް ފަހުރުވެރިވަން." ޓުޓޯސްޕޯޓް އަށް ދިން އިންޓަވިއުގައި ޑި ލައިޓް ބުންޏެވެ.
"މި އެވޯޑް ހާސިލްކުރި ފުރަތަމަ ޑިފެންޑަރަށްވުމަކީ އަހަރެންނަށް ލިބުނު ވަރަށް ބޮޑު އުފަލެއް. އާއްމުގޮތެއްގައި ފޯވާޑުންނާއި މިޑްފީލްޑަރުންނަށް ލިބޭ އެވޯޑެއް ތަފާތު އެހެން ރޯލެއް ކުޅޭ ޑިފެންސްގައި ހަރަކާތްތެރިވާ އަހަރެން ފަދަ ކުޅުންތެރިއަކަށް ލިބުމަކީ މި އެވޯޑަށް ލިބުނު އިތުރު ހާއްސަކަމެއް."ޑި ލައިޓް ބުންޏެވެ.
2014 ވަނަ އަހަރުގެ ފަހުން އަޔެކްސް އަށް އެއްވެސް މުބާރާތެއްގެ ތައްޓެއް ލިބިފައިނުވީނަމަވެސް، އެއް އަހަރުން އަނެއް އަހަރަށް އެ ޓީމުން އަންނަނީ ޒުވާން ގިނަ ކުޅުންތެރިންނާއިއެކު މޮޅު ކުޅުމެއް ދައްކަމުންނެވެ. އެގޮތުން، ޑި ލައިޓްގެ ފަރާތުން ފެނުނު ރަނގަޅު ކުޅުމުގެ ސަބަބުން އޭނާ އަކީ އަޔެކްސްގެ ކެޕްޓަން ކަމުގެ ޒިންމާ އަދާކުރަމުން އަންނަ ހުނަރުން ފުރިފައިވާ ކުޅުންތެރިއެކެވެ.
މި އެވޯޑް މީގެކުރީން ހާސިލްކޮށްފައިވާ ކުޅުންތެރިންގެ ތެރޭގައި ބާސެލޯނާގެ ލިިއޮނަލް މެސީ އާއި ފްރާންސްގެ ޕައުލް ޕޮގްބާ އާއި ހޮލެންޑްގެ ރަފައެލް ވެންޑަވާޓް އާއި އިންގްލެންޑްގެ ވޭން ރޫނީ އާއި ރަހީމް ސްޓާލިންގެ އިތުރުން ބްރެޒިލްގެ އަލެކްސެންޑާ ޕަޓޯ އަދި ޕޯޗުގަލްގެ ރެނާޓޯ ސަންޗޭސް ހިމެނެ އެވެ.