ފޮރިން މިނިސްޓަރު ޢަބްދުﷲ ޝާހިދު ޖަޕާނަށް ފުރާވަޑައިގެންފިއެވެ.
އަބްދުﷲ ޝާހިދާ އެކު އެ ދަތުރުފުޅުގައި ދެ މިނިސްޓަރުން ޖަޕާނަށް ފުރާވަޑައިގެންފައިވެއެވެ. އެމަނިކުފާނުގެ އަރިހުގައި ވަޑައިގެންނެވީ އިކޮނޮމިކް މިނިސްޓަރ ފައްޔާޒް އިސްމާއީލާއި، ފިނޭންސް މިނިސްޓަރ އިބްރާހިމް އަމީރުއެވެ.
ފޮރިން މިނިސްޓަރު ޝާހިދު އަންގާރަ ދުވަހުގެ ރޭ ކުރެއްވި ޓްވީޓެއްގައި ވިދާޅުވީ ރައީސް ސޯލިހް އިންޑިއާއަށް ކުރެއްވި ރަސްމީ ދަތުރުފުޅުގައި އެމަނިކުފާނާ އެކު އެ ގައުމަށް ވަޑައިގަތުމަށްފަހު، ދިއްލީން ޖަޕާނަށް ފުރައިވަޑައިގެންފައިވާ ކަމަށެވެ.
After accompanying President @ibusolih on his State Visit to India, leaving Delhi with Minister of Economic Development Hon. @faya_i and Minister of Finance Hon. Ameer to Tokyo to hold discussions with senior Japanese Government Officials.
— Abdulla Shahid (@abdulla_shahid) December 18, 2018
އެ ދަތުރުފުޅުގައި ޖަޕާނުގެ ސަރުކާރުގެ އިސް އޮފިޝަލުންނާ އެކު ބައްދަލުކުރައްވާނެ ކަމަށް މިނިސްޓަރު ޝާހިދު ވަނީ ވިދާޅުވެފައެވެ.
މިއީ ވަޒީރުކަމާ ހަވާލުވެވަޑައިގަތްފަހު މިނިސްޓަރ ޝާހިދު ވަޑައިގަންނަވާ ތިން ވަނަ ޤައުމެވެ. އެގޮތުން މަޤާމާ ހަވާލުވެވަޑައިގަތުމަށްފަހު އެންމެ ފުރަތަމަ ވެސް އިންޑިއާއަށް އެމަނިކުފާނު ވަޑައިގެންނެވިއެވެ. އަދި އެއަށްފަހު ޔުނައިޓެޑް އަރަބް އެމިރޭޓްސްއަށް ވަޑައިގެންނެވިއެވެ.
މިނިސްޓަރު ޝާހިދު އިންޑިއާއަށް ކުރެއްވި ފުރަތަމަ ދަތުރުފުޅުގައި ވެސް މިނިސްޓަރު ފައްޔާޒާއި މިނިސްޓަރު އަމީރު ބައިވެރިވެވަޑައިގެންނެވިއެވެ.