ރަޝިޔާގައި ބޭއްވުނު އެންމެ ފަހުގެ ފީފާ ވޯލްޑްކަޕް ގާތްގަނޑަކަށް ދުނިޔޭގެ ދެބައިކުޅަ އެއްބަޔާއި ގާތްކުރާ އަދަދަކަށް މީހުން ބެލިކަމަށް ފީފާ އިން ނެރުނު ރިޕޯޓެއްގައިވެއެވެ.
ޕަބްލިސިސް މީޑިއާ ސްޕޯޓް އެންޑް އެންޓަޓެއިންމެންޓުން ހާމަކުރި ގޮތުގައި ރެކޯޑް އަދަދެއްކަމަށްވާ 3.57 ބިލިއަން މީހުން ދުނިޔޭގެ އެކި ކަންކޮޅުތަކުން އެންމެ ފަހުގެ ވޯލްޑްކަޕް ބަލާފައިވެއެވެ.
އެގޮތުން، ކްރޮއޭޝިއާ ބަލިކޮށް ފްރާންސުން ވޯލްޑްކަޕްގެ ފައިނަލް މެޗު 4-2 އިން ކާމިޔާބުކުރިއިރު، އެ މެޗު ދުނިޔޭގެ އެކި ހިސާބުތަކުން ގާތްގަނޑަކަށް 1 ބިލިއަނަށް ވުރެ ގިނަ މީހުން ބެލިއިރު، މި މުބާރާތުގެ ސެމީ ފައިނަލްގައި ކްރޮއޭޝިއާ އަތުން އިންގްލެންޑް ބަލިވި މެޗު ގާތްގަނޑަކަށް 327.5 މިލިއަން މީހުން ބަލާފައިވެއެވެ.
މި ރިޕޯޓްގައިވާގޮތުން، ނިމިދިޔަ ވޯލްޑްކަޕްގެ 64 މެޗުގެ ތެރެއިން ކޮންމެ މެޗެއް އެވްރެޖްކޮށް 191 މިލިއަން މީހުން ބަލާފައިވާއިރު މިއީ އެންމެ ފަހުން ބްރެޒިލްގައި ބޭއްވުނު 2014 ވަނަ އަހަރުގެ މުބާރާތުގެ މެޗެއް އެވްރެޖްކޮށް ބެލި މީހުންގެ އަދަދުކަމަށްވާ 187 މިލިއަނަށްވުރެ ގިނަ އަދަދެކެވެ.
މީގެއިތުރުން، އެންމެ ފަހުގެ ވޯލްޑްކަޕްގެ ކަވަރޭޖް، އޭޝިޔާގެ 1.6 ބިލިއަން މީހުންނަށް ފޯރާފައިވާއިރު މިފަހަރުގެ މުބާރާތަށް ކޮލިފައިނުވިނަމަވެސް ޗައިނާ އިން އެކަނިވެސް ގާތްގަނޑަކަށް 655.7 މިލިއަން މީހުންވަނީ ވޯލްޑްކަޕްގެ މެޗުތައް ބަލާފައެވެ.