ބެލުންތެރިންނާއި ހަމަޔަށް ގެނެސްދޭ ފިލްމް ތަކަކީ އެމީހުންގެ ފައިސާއާއި ވަގުތަށް އެކަށީގެންވާ މިންވަރަށް އިންސާފު ކުރެވޭ ފިލްމްތަކަށް ވާންޖެހޭނެ ކަމަށް މަޝްހޫރު ބޮލީވުޑް އެކްޓަރު އަކްޝޭ ކުމާރު ބުނެފިއެވެ.
އެކްޝަން ފިލްމްތަކުން ގިނަ ބައެއްގެ މަޤްބޫލްކަން ހޯދާފައިވާ އަކްޝޭ ވަނީ ފަހަކަށް އައިސް ތަފާތު އެކި ވައްތަރުގެ ފިލްމްތައް ބެލުންތެރިންނާއި ހަމަޔަށް ގެނެސްދީފައެވެ.
ފިލްމް" ޕެޑްމޭން"، "ޓޮއިލެޓް- އެކް ޕްރޭމް ޚަތާ" ފަދަ ފިލްމް ތަކަކީ ވަރަށް ތަފާތު އެކަމަކު ކާމިޔާބު ފިލްމްތަކެވެ. މި ފިލްމްތަކަށް ފަހު އަނެއްކާ ވެސް އަކްޝޭ ވަނީ މުޅިން ތަފާތު ރޯލަކުން ބެލުންތެރިންނާއި ހަމަޔަށް އަންނަން ތައްޔާރު ވެފައެވެ. ފިލްމް"ކޭސަރީ" ގައި އަކްޝޭ ފެނިގެންދާނީ ސިކުންގެ މީހެއްގެ ރޯލުންނެވެ.
މިހާރު އިންޓަނެޓުން ބޭނުން ވައްތަރެއްގެ މުނިފޫހިފިލުވުމުގެ ވީޑިއޯތައް ވަރަށް ފަސޭހައިން ލިބެން ހުންނަ ކަމަށާއި އާއިލާއެއް ގޮވައިގެން ބޮޑު ޚަރަދު ކޮށްފައި މީހުން ސިނަމާތަކަށް ފިލްމް ބަލަން ދާނީ އެމީހުން އެވަރަށް ހިތްހަމަޖެހޭނެ ފަދަ ފިލްމްތަކެއް ގެނެސް ދެވިގެން ކަމަށް އަކްޝޭ ވަނީ ބުނެފައެވެ.
އެކި ވައްތަރުގެ ފިލްމްތައް ކުޅެން އޭނާ އެއްބަސްވަނީ އެ ސަބަބަށްޓަކާ ކަމަށް ބެލެވެއެވެ.