ކެންޔާގެ ޕެޓްރޯލް ޓޭންކަރެއް، ފަސިންޖަރުން އުފުލާ ބަހެއްގައި ޖެހި ހިނގި އެކްސިޑެންޓެއްގައި 17 މީހުން މަރުވެއްޖެއެވެ.
ޚަބަރުތައް ބުނާ ގޮތުން ޓޭންކަރު ބަހުގައި ޖެހިފައިވަނީ ފަސިންޖަރަކު ބަހަށް އެރުވުމަށްޓަކާ ބަސް މަގުގެ ކައިރިފަށުގައި މަޑުކޮށްލައިގެން އޮއްވައެވެ. މި އެކްސިޑެންޓް ހިނގަން މެދުވީ ސަބަބެއް އަދި ސާފުވާގޮތެއް ނުވެއެވެ. މި އެކްސިޑެންޓްގައި ކުޑަ ކުދިންވެސް މަރުވެފައިވާ ކަމަށް ޚަބަރުތައް ބުނެއެވެ.
މަގުމަތީގެ އެކްސިޑެންޓް ތަކަކީ ކެންޔާގައި ވަރަށް އާންމު އެއްޗެކެވެ. ސަބަބެއް ކަމަށް ބެލެވިފައިވަނީ މަގާއި އެކަށީގެންނުވާ އުޅަނދު ތަކުގެ އިތުރުން ހަލާކުވެފައިވާ ފެންވަރު ދަށް މަގުތަކެވެ. މީގެ އިތުރުން ތަޖުރިބާ ނެތް ޑްރައިވަރުން އުޅަނދުތައް ދުއްވުމުގެ ސަބަބުން ދިމާވާ އެކްސިޑެންޓްތައް ވެސް މަދެއް ނޫނެވެ.
ކެންޔާގެ ނޭޝަނަލް ޓްރާންސްޕޯޓް އެންޑް ސޭފްޓީ އޮތޯރިޓީގެ ތަފާސް ހިސާބުތަކުން ދައްކާ ގޮތުގައި މި އަހަރުގެ ޑިސެމްބަރު މަހުގެ 12 ވަނަ ދުވަހާއި ހަމަޔަށް ކެންޔާގައި އެކްސިޑެންޓް ތަކުގައި މަރުވީ މީހުންގެ އަދަދު ވަނީ 2945 ށް އަރާފައެވެ.