ދިވެހި ރައްޔިތުންނަށް ސަލާމަތާ ރައްކާތެރިކަން ޔަޤީންކޮށް ދިނުމަށްޓަކައި ޖުމްހޫރީ ޕާޓީގެ ވެރިކަމެއްގައި ދުނިޔޭގެ އެންމެ ފެންވަރު ރަގަޅު ވަސީލަތްތައް ދިވެހި ފުލުހުންނަށް ޤާއިމުކޮށް ދެއްވާނެ ކަމަށް އެ ޕާޓީގެ ލީޑަރު އަދި ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެ އެވެ.
އެ މަނިކުފާނު މިހެން ވިދާޅުވީ ރޭ ޖުމްހޫރީ ޕާޓީން ހދ. ނޮޅިވަރަމްގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ޤާސިމް ވިދާޅުވީ ލާއިންސާނީ އަމަލުތައް ހިންގާ، މީހުން މެރުން ފަދަ ނުބައި އަމަލުތައް އާންމުވަމުންދާ އިރު، އެކަންކަން ހުއްޓުވަން ދިވެހި ފުލުހުން ވަރަށް ބުރަކޮށް އިހްލާސްތެރި ހިދުމަތްތަކެއް ކުރައްވަމުން ގެންދަވާކަން ޝުކުރުވެރިކަމާ އެކު ބަލައިގަންނަ ކަމަށެވެ.
އެހެން ނަމަވެސް ފުލުހުންގެ މަސައްކަތަށް ބޭނުންވާ އެންމެ ފުރިހަމަ ވަސީލަތްތައް ޤާއިމުވެފައި ނެތުމުން ފުލުހުންނަށް ކޮންމެވެސް ވަރެއްގެ ގޮންޖެހުންތަކެއް މިއަދު ކުރިމަތިވެފައިވާ ކަމަށް ޤާސިމް ވިދާޅުވި އެވެ.
އެހެން ކަމުން ޖުމްހޫރީ ޕާޓީގެ ވެރިކަމެއްގައި ފުލުހުންނަށް ޒަމާނީ ވަސީލަތްތައް ދުނިޔޭގެ ފެންވަރަށް ޤާއިމުކޮށް ދެއްވާނެ ކަމަށާއި ދިވެހި ރައްޔިތުންގެ ސަލާމަތާ ރައްކާތެރިކަމަށްޓަކައި ނުފޮރުޅާ އެންމެ ގާކޮޅެއް ވެސް ނުބާއްވާނެ ކަމަށް ގާސިމް ވިދާޅުވި އެވެ.
"ފުލުހުންނަށް ބޭނުންވާ ވަސީލަތްތައް އަޅުގަނޑުމެންގެ ވެރިކަމެއްގައި ފުލުހުން އެދޭ ގޮތަށް ޤާއިމުކޮށް ދޭނެކަން ޔަޤީން ކުރަން. ދުނިޔޭ އެއްވެސް ތަނެއްގައި ނުހިނގާހާ ރަނގަޅު ފެންވަރުގައި އެތަން ހިންގާނީ. ރާއްޖޭގެ ކޮންމެ ރަށެއްގައި ވެސް އުޅޭ މުޖުރިމުން ހޯދާ އަޅުގަނޑުމެންގެ ވެރިކަމެއްގައި އެ މީހުންނަކަށް ނުތިބެވޭނެ." ޤާސިމް ވިދާޅުވި އެވެ.