ފީފާ ކްލަބް ވޯލްޑްކަޕްގެ ފައިނަލްގައި ރޭ ކުޅުނު މެޗުގައި ޔޫއޭއީގެ އަލް އައިން ބަލިކޮށް ސްޕެއިނުގެ ރެއާލް މެޑްރިޑުން ހަތަރުވަނަ ފަހަރަށް މި މުބާރާތުގެ ތަށި ކާމިޔާބުކޮށްފިއެވެ.
އަބޫދާބީގެ ޒައެދު ސްޕޯޓްސް ސިޓީ ސްޓޭޑިއަމްގައި ކުޅުނު މި މެޗު ރެއާލުން ކާމިޔާބުކުރި 4-1 އިންނެވެ.
މި މެޗުގެ 14 ވަނަ މިނެޓުގައި ރެއާލަށް ލީޑް ނަގައިދިނީ ކްރޮއޭޝިއާގެ މިޑްފީލްޑަރު ލޫކާ މޮޑްރިޗް އެވެ. މިއީ އަލް އައިންގެ ޕެނަލްޓީއޭރިޔާބޭރުން ފޮނުވާލި ހަމަލާއަކުން އޭނާ ކާމިޔާބުކުރި ގޯލެކެވެ. މި މެޗުގައި ރެއާލުން ލީޑު ނެގުމުގެ ކުރީން، އަލް އައިންގެ ކުޅުންތެރިންނަށް ވަނީ ލަނޑުޖަހާނެ ރަނގަޅު ދެ ފުރުޞަތުލިބި ބޭކާރުވެފައެވެ. މި ހާފު ނިމުނީ 1-0 އިން ރެއާލް ކުރީގައިއޮވެގެންނެވެ.
ދެވަނަ ހާފުގައި ރެއާލްގެ ލީޑް ފުޅާކޮށްދިނީ ފަހަކަށް އައިސް މޮޅުކުޅުމެއް ދައްކަމުން އަންނަ ޒުވާން މިޑްފީލްޑަރު މާކޮސް ލޮރެންޓޭ އެވެ. މިއީ އަލް އައިންގެ ޕެނަލްޓީއޭރިޔާބޭރުން އެއްފަހަރުން ފޮނުވާލައިގެން އޭނާ ކާމިޔާބުކުރި ގޯލެކެވެ.
ރެއާލްގެ ތިންވަނަ ލަނޑު، މެޗުގެ 78 ވަނަ މިނެޓުގައި ޖަހައިދިނީ ކެޕްޓަން ސާޖިއޯ ރާމޯސް އެވެ. މިއީ އެ ޓީމުގެ މޮޑްރިޗް ނަގައިދިން ކޯނަރަކުން ލިބުނު ބޯޅައެއް ރާމޯސް ބޮލުން ފޮނުވާލައިގެން ކާމިޔާބުކުރި ގޯލެކެވެ.
މެޗު ނިމެން ހަ މިނެޓަށްވެފައިވަނިކޮށް އަލް އައިންގެ ސުކާސާ ޝިއޮޓާނީ ވަނީ އެ ޓީމަށް ފަރަގު ކުޑަކޮށްދީފައެވެ.
ރެއާލުން މި މެޗުގައި ކާމިޔާބުކުރި ހަތަރުވަނަ ލަނޑަކީ، މެޗުގެ އިތުރުވަގުތުގައި އަލް އައިންގެ ޔަހިޔާ ނާދަރް އަތުން ބައިކޮޅަށް ވަން ގޯލެކެވެ.
މި މުބާރާތުގެ ތިންވަނަ ހޮވާ މެޗުގައި ދެކުނު އެމެރިކާގެ ޗެމްޕިއަން ރިވާ ޕްލޭޓް ވަނީ 4-0 އިން އޭޝިޔާގެ ޗެމްޕިއަން ކަޝިމާ އެންޓްލާސް ބަލިކޮށްފައެވެ. މި މެޗުގައި ރިވާ ޕްލޭޓްގެ ގޮންޒާލޯ މާޓިނޭޒް ދެލަނޑު ޖެހިއިރު އެ ޓީމުގެ އަނެއް ލަނޑުތައް ޖަހައިދިނީ ބްރޫނޯ ޒުކުލީނީ އާއި ސަންޓޯސް ބޯރޭ އެވެ.