އަހުލާގީ މައްސަލައެއްގެ ސަބަބުން އިންޓަ މިލާނުން ބެލްޖިއަމްގެ ގައުމީ ޓީމުގެ ކުރީގެ މިޑްފީލްޑަރު ރަޖާ ނައިންގޮލަން ސަސްޕެންޑްކޮށްފިއެވެ.
އިންޓަ އިން ނައިންގޮލަން ސަސްޕެންޑްކޮށްފައިވަނީ ތަކުރާރުކޮށް ޓީމުގެ ފަރިތަކުރުންތަކަށް ލަހުން ހާޒިރުވާތީކަމަށް ބެލެވެއެވެ.
އާ ސީޒަނަށް 33 މިލިއަން ޕައުންޑްގެ ފީއަކަށް އިޓަލީގެ އޭއެސް ރޯމާ އިން އިންޓަ އަށް ބަދަލުވި ނައިންގޮލަން ވަނީ އެ ޓީމަށް މިހާތަނަށް ކުޅުނު 15 މެޗުގައި 3 ލަނޑުޖަހައިދީފައެވެ.
ލީގުގައި އިންޓަ އަށް ދެން އޮތީ މި މަހުގެ 26 ވަނަ ދުވަހު، ތާވަލްގެ ދެވަނައިގައި އޮތް ނަޕޯލީ އާ ދެކޮޅަށް ކުޅޭ މުހިއްމު މެޗެވެ. ސެންސީރޯގައި ކުޅުމަށް ހަމަޖެހިފައިވާ މި މެޗުގައި ސަސްޕެންޝަނުގެ ސަބަބުން ނައިންގޮލަން އަށް ނުކުޅެވޭނެއެވެ.
މީގެކުރީން، މި އަހަރުގެ ކުރީކޮޅު އާ އަހަރުގެ ފެށުން ފާހަގަކުރުމުގެ ގޮތުން ޕާޓީ ކުރި ވީޑިއޯއެއް ފެންމަތިވުމުން އޭނާގެ ކުރީގެ ކްލަބް ރޯމާ އިން ވަނީ އޭނާ އަށް ފިޔަވަޅު އަޅާފައެވެ.
އެންމެ ފަހުގެ ވޯލްޑްކަޕަށް ބެލްޖިއަމްގެ ކޯޗު ރޮބާޓޯ މާޓިނޭޒް ނެގި ސްކޮޑުގައި ނުހިމެނުމުން ނައިންގޮލަން ވަނީ ގައުމީ ޓީމަށް ކުޅުން ހުއްޓާލައިފައެވެ.