ސޮނީ އެންޓަޓެއިންމަންޓް ޓެލެވިޝަން އިން ދައްކަމުން އަންނަ "އިންޑިއަން އައިޑަލް ސީޒަން 10" ގެ ގްރޭންޑް ފިނާލޭ މިރޭ ދައްކާ ގޮތަށް ވަނީ ހަމަޖެހިފައެވެ.
ފައިނަލަށް ދަތުރު ކޮށްފައިވާ 5 ބައިވެރިންނާއެކު ގްރޭންޑް ފިނާލޭ މިރޭ ބާއްވާ އިރު މި މުބާރާތް ކާމިޔާބު ކުރާނެ ފަރާތަކާއިމެދު ވަނީ ގިނަ ސުވާލުތަކެއް އުފެދިފައެވެ. ފައިނަލްގައި ވާދަ ކުރަނީ ހުނަރުން ފުރިފައިވާ 5 ބައިވެރިން ކަމަށްވާ ސަލްމާން އަލީ، ނީލަަންޖަނާ ރޭއި، އަންކުޝް ބަރަދްވާޖް، ނިތިން ކުމާރް އަދި ވިބޯރް ޕަރަޝާރްއެވެ.
މިރޭގެ ހަފްލާގައި އާނަންދް އެލް.ރާއީގެ ފިލްމް "ޒީރޯ"ގެ ތަރިން ކަމަށްވާ ޝާހްރުކްޚާން، އަނުޝްކާ ޝަރްމާ އަދި ކެޓްރީނާ ކެއިފްވެސް ބައިވެރިވާނެއެވެ. މިރޭގެ ހަފްލާގައި ބައިވެރިންގެ ފަރާތުން އެންމެ ފަހުގެ ހުށަހެޅުންތައް ފެނިގެންދާނެއެވެ.
މި ހަފްލާގައި މަޝްހޫރު ކޮރިއޮގްރާފާ ގީތާ ކަޕޫރު އަދި އެކްޓްރެސް ޝިލްޕާ ޝެއްޓީ، ސޮނީ ޓީވީއިން ކުރިޔަށް ދެއްކުމަށް ހަމަޖެހިފައިވާ ޑާންސް ރިއަލިޓީ ޓީވީ ސީީރީސް "ސުޕާ ޑާންސާ ޗެޕްޓަރ 3" ގެ ޕްރޮމޯޝަނަށް ބައިވެރިވާނެއެވެ.
ބޮލީވުޑްގެ މަޝްހޫރު ލަވަކިޔުންތެރިން ކަމަށްވާ ޕިޔާރޭލާލް، ސުރޭޝް ވަޑްކަރް، ބައްޕީ ލެހެރީ އަދި އަލްކާ ޔަގްނިކް ފަދަ ލަވަކިޔުންތެރިންނާއެކު ފައިނަލްގައި ވާދަކުރާ 5 ބައިވެރިން ލަވަކިޔާގޮތަށް ވެސް ވަނީ ހަމަޖެހިފައެވެ.
"އިންޑިއަން އައިޑަލް ސީޒަން 10"ގެ ޖަޖުންގެ ތެރޭގައި ހިމެނެނީ ނެހާ ކައްކަރް، ވިޝާލް ދަޑްލާނީ، އަދި ޖާވިދް އަލީއެވެ. މި ޝޯވ ހުށަހަޅައިދެނީ މަނީޝް ޕޯލްއެވެ.
މިހާތަނަށް އިންޑިއަން އައިޑަލްގެ ހުރިހާ ސީޒަނެއް ނިމިގެން ދިޔައީ 26 އެޕިސޯޑުން ކަމަށްވީ ނަމަވެސް މި ޒީސަން ނިމިގެން މިދަނީ 50 އެޕިސޯޑުންނެވެ. އިންޑިއަން އައިޑަލް ސީޒަން 1 ކާމިޔާބު ކޮށްފައިވަނީ އަބީޖީތް ސާވަންތްއެވެ.