އަހަރަކަށް ފަހު މި ހިނގާ ޑިސެމްބަރު މަހުގެ 29 ވަނަ ދުވަހު ފެށުމަށް ހަމަޖެހިފައިވާ "ދަ ކަޕިލް ޝަރްމާ ޝޯވ" މި ފަހަރުގެ ސީޒަންގެ ފުރަތަމަ އެޕިސޯޑްގެ މެހްމާނުންނަކީ ފިލްމް "ސިމްބާގެ" ތަރިންނެވެ.
ރޯހިތު ޝެއްޓީގެ ފިލްމް "ސިމްބާ"ގެ ތަރިން ކަމަށްވާ ރަންވީރް ސިންގް، ސާރާ އަލީ ޚާން އަދި ރޯހިތު ޝެއްޓީ ބައިވެރިވާ ފުރަތަމަ އެޕިސޯޑުގެ ޓީޒާތަކުން ފެންނަ ގޮތުގައި އެހެން އެޕިސޯޑްތަކެކޭ ވެސް އެއްގޮތަށް މި ފަހަރުގެ އެޕިސޯޑަކީވެސް ބަލާ މީހުން ހެއްވާލާ މަޖާ އެޕިސޯޑެކެވެ.
މި ޝޯވ އެނބުރި އައުމަށްފަހު މި އަހަރަކީ އަނެއްކާވެސް އެންމެން ހެއްވާލާނެ އަހަރެއް ކަމުގައިވާނެ ކަމަށް އުއްމީދު ކުރާ ކަމަށް ރަންވީރް ވަނީ ބުނެފައެވެ. ކަޕިލް ޝަރްމާގެ އެނބުރި އައުން ވެގެންދާނީ މި ޝޯވ ބަލާ ފަރާތްތަކަށް ނުހަނު ހިތްހަމަޖެހުން ގެނެސްދޭނެ ޚަބަރަކަށެވެ.
މިފަހަރުގެ ސީޒަނުގައި ވެސް ކަޕިލްއާއިއެކު އެ ޝޯވގައި ހަރަކާތްތެރިވާ ކިކޫ ޝަރްދާ، ސުމޯނާ ޗަކްރަވަތީ އަދީ ޗަންދަން ޕްރަބާކަރް ފެނިގެންދާނެއެވެ. މީގެ އިތުރުން ބާރްތީ ސިންގް އަދި ކްރުޝްނާ އަބީޝެކްވެސް ފެނިގެންދާނެއެވެ.
މި ފަހަރުގެ ސީޒަންގައި ކުރީގެ ސީޒަންތަކުން ފެނިގެން ގޮސްފައިވާ ކެރެކްޓާ ޑރ. މަޝްހޫރު ގުލާޓީ ފެނިގެން ނުދާނެއެވެ.