ދިޔަވަރު ބޮޑުވާ ގަޑިތަކުގައި ދެކުނާއި މެދުރާއްޖެތެރޭގެ ބައެއް ރަށްތަކަށް އުދައެރުން އެކަށީގެންވާ ކަމަށް މޫސުމާއިބެހޭ ގައުމީ އިދާރާއިން ބުނެފިއެވެ.
ދެކުނު އިންޑިއާ ކަނޑުގައި އުފެދިފައިވާ ތޫފާންތަކުގެ ސީދާ އަސަރެއް ރާއްޖެއަށް ކުރާނެ ކަމަކަށް ލަފާ ނުކުރެވޭ ކަމަށް ވެސް މޫސުމާއިބެހޭ އިދާރާއިން ބުނެއެވެ. އެހެން ނަމަވެސް މި ތޫފާންތަކުން އުފައްދާ ބޮޑެތި ރާޅުތަކުގެ ސަބަބުން، ދިޔަވަރު ބޮޑުވާ ގަޑިތަކުގައި ދެކުނާއި މެދުރާއްޖެތެރޭގެ ބައެއް ރަށްތަކަށް އުދައިގެ އަސަރު ކުރުމަކީ އެކަށީގެންވާ ކަމެއް ކަމަށް އެ އިދާރާއިން ބުނެއެވެ.
މިއަދުގެ މޫސުމަށް ބަލާއިރު ރާއްޖޭގެ މޫސުމް އާންމު ގޮތެއްގައި ރަނގަޅެވެ. ދެކުނުގެ އަތޮޅުތަކަށް ހުޅަނގު އުތުރާއި އުތުރުން އަދި އެހެން ހިސާބުތަކަށް އުތުރާއި އިރުއުތުރުން ހުރިހާ ހިސާބުތަކަށް ވެސް ގަޑިއަކު 3 މޭލާއި 13 މޭލާއި ދެމެދުގެ ބާރު މިނެއްގައި ވައި ޖެހޭނެ ކަމަށް މޫސުމާއިބެހޭ އިދާރާއިން ލަފާކުރެއެވެ.
ރާއްޖޭގެ ކަނޑުތައް މަޑުވާނެ ކަމަށް ލަފާ ކުރެވޭ ކަމަށް ވެސް މޫސުމާއިބެހޭ ގައުމީ އިދާރާއިން ލަފާކުރެއެވެ.