އިންޑިއަން އައިޑަލް ސީޒަން 10 ސަލްމާން އަލީ ކާމިޔާބު ކޮށްފިއެވެ.
މި މުބާރާތުގެ ވަނަތައް އިއުލާން ކޮށްފައިވަނީ އާދީއްތަ ދުވަހުގެ ރޭ ބޭއްވިގެން ދިޔަ އިންޑިއަން އައިޑަލް ސީޒަން 10ގެ ގްރޭންޑް ފިނާލޭގައެވެ.
ސޮނީ އެންޓަޓެއިންމަންޓް ޓެލެވިޝަން އިން މިއަހަރުގެ ޖުލައި 7 ގައި ދައްކަން ފެށި، 50 އެޕިސޯޑަށް ދިގުދެމިގެން ދިޔަ މިޝޯވ ވަނީ ގިނަ އަދަދެއްގެ ބެލުންތެރިންގެ ތަރުހީބާއި ލޯބި ހޯދާފައެވެ.
އިންޑިއަން އައިޑަލްގެ 1 ވަނަ، ސަލްމާން އަލީ ކާމިޔާބު ކޮށްފައިވާ އިރު އޭނާއަށް ވަނީ މުބާރާތުގެ ރަންތަށީގެ އިތުރުން، 25 ލައްކަ އިންޑިއަން ރުޕީސްގެ ފައިސާގެ އިނާމާއި، ޑަޓްސުން ގޯ ކާރެއް ލިބިފައެވެ.
ޝޯގެ ދެވަނަ ލިބިފައި ވަނީ އަންކުޝް ބަރަދްވާޖް އަށެވެ. އަދި 3 ވަނަ ލިބިފައިވަނީ ނިލާންޖަނާ ރެއި އަށެވެ. މިދެ ބައިވެރިންނަށް ވެސް ވަނީ 5 ލައްކަ ރުޕީސްގެ ފައިސާގެ އިނާމު ލިބިފައެވެ.
މީގެއިތުރުން ފައިނަލަށް ދިޔަ ފަސް ބައިވެރިންގެ ތެރޭގައ ހިމެނޭ ދެބައިވެރިން ކަމަށްވާ ވިބޯރް ޕަރާޝަރް އަދި ނިތިން ކުމާރް އަށް ވަނީ 3 ލައްކައިގެ ފައިސާގެ އިނާމު ލިބިފައެވެ. ޝޯވ ކަމިޔާބު ކުރި ފަރާތް އިޢުލާން ކުރުމުގެ ކުރިން ނިތިންއަށް ވަނީ "ޕަފޯމާ އޮފް ދަ ސީޒަން"ގެ މެޑަލް ދީފައެވެ.
ޝޯގެ ޖަޖުން ވިޝާލް ދަޑްލާނީ، ނޭހާ ކައްކަރް އަދި ޖާވިދް އަލީގެ އިތުރުން، ފިލްމު ޒީރޯގެ ތަރިން ކަމަށްވާ ޝާހްރުކް ޚާން، ކެޓްރީނާ ކެއިފް، އަދި އަނުޝްކާ ޝަރްމާ ވަނީ މިޝޯގައި ބައިވެރި ވެފައެވެ.
މި ހަފްލާގައި މަޝްހޫރު ކޮރިއޮގްރާފާ ގީތާ ކަޕޫރު އަދި އެކްޓްރެސް ޝިލްޕާ ޝެއްޓީ، ސޮނީ ޓީވީއިން ކުރިޔަށް ދެއްކުމަށް ހަމަޖެހިފައިވާ ޑާންސް ރިއަލިޓީ ޓީވީ ސީީރީސް "ސުޕާ ޑާންސާ ޗެޕްޓަރ 3" ގެ ޕްރޮމޯޝަނަށް ބައިވެރިވިއެވެ.
ބޮލީވުޑްގެ މަޝްހޫރު ލަވަކިޔުންތެރިން ކަމަށްވާ ޕިޔާރޭލާލް، ސުރޭޝް ވަޑްކަރް، ބައްޕީ ލެހެރީ އަދި އަލްކާ ޔަގްނިކް ފަދަ ލަވަކިޔުންތެރިންނާއެކު ފައިނަލްގައި ވާދަކުރި 5 ބައިވެރިން ވަނީ ލަވަ ކިޔާފައެވެ. މީގެ އިތުރުން 3 ޖަޖުންގެ ހުށަހެޅުން ފެނިގެން ދިޔައެވެ.