ޕީޕީއެމްއިން ވަކިވިކަން އިއުލާން ކުރުމަށް މިރޭ ޕީޕީއެމްގެ ކައުންސިލް މެމްބަރެއްގެ ގޮތުގައި ހުންނެވި އިބްރާހީމް މުއާޒް އަލީ ބޭއްވި ނޫސް ކޮންފަރެންސްގައި ކުރީގެ ރައީސް ޢަބްދުﷲ ޔާމީން އަބްދުލްޤައްޔޫމްއާއި ގުޅޭ ގޮތުން ދެއްކެވި ވާހަކަ ދޮގުކޮށް ޕީޕީއެމުން ނޫސްބަޔާނެއް ނެރެފިއެވެ.
މިރޭ ޕީޕީއެމުން ނެރެފައިވާ ނޫސްބަޔާނުގައި މުއާޒް އެނާގެ އަމިއްލަ ހައިސިއްޔަތުން، މީޑިއާގައި 26 ޑިސެމްބަރު 2018 ވަނަ ދުވަހުގެ ރޭ ބައްދަލުކޮށް، ޕާޓީގެ ރައީސް ޢަބްދުﷲ ޔާމީން އަބްދުލްޤައްޔޫމަށް ނިސްބަތްކޮށް ދެއްކެވި ރޯބުހުތާނު ދޮގު ވާހަކަތައް ހަރުކަށި އިބާރާތުން ކުށްވެރިކުރާ ކަމަށެވެ.
އަދި މުއާޒް މިއަމަލާއި ގުޅިގެން ޕާޓީގެ އަސާސީގެ ޤަވާއިދުގެ ދަށުން އުފެދިފައިވާ ސުލޫކީ ކޮމިޓީގެ ހިންގާ ގަވާއިދުގައިވާ ގޮތުގެ މަތިން މައްސަލަ ބަލާ ތަހުގީގު ކުރުމަށް ހުށަހަޅާ ކަމަށް ވެސް އެ ބަޔާނުގައި ވެއެވެ.
މުއާޒްގެ ނޫސް ކޮންފަރެންސްގައި އޭނާ ވަނީ ރިޔާސީ ލޯންޗްކޮޅުގައި ބޮމެއް ގޮވި ހާދިސާގެ ގިނަ ވާހަކަތަކެއް ދައްކަވާފައެވެ. ރައީސް ޔާމީނަށް އަމާޒުވާ ގޮތަށް ގިނަ ތުހުމަތު ތަކެއް ވަނީ ކުރައްވާފައެވެ.
ރައީސް ޔާމިންގެ ސަރުކާރުގައި ރައީސް އޮފީހުގެ ތަރުޖަމާނެއްގެ ގޮތުގައި މަސައްކަތް ކުރައްވާފައިވާ މުއާ އިސްތިއުފާ ދިންކަން އިއުލާން ކޮށްފައިވާއިރު، އޭނާ މޯލްޑިވްސް ތާޑްވޭ ޑިމޮކްރެޓިކް ޕާޓީއާ ގުޅެން އުޅޭކަމުގެ އަޑުތައް ވަނީ ފެތުރިފައެވެ.