އައްޑޫގައި ހުރި އިމްޕޯޓް މުދާ ވިއްކާ ތަންތަނުންނާއި ހޮޓަލާއި ކެންޓީނު ފަދަ ތަންތަނުން މަހަކު 200ރ. ފީއެއް ނަގަން ފަށާނީ ޖުލައި 1 އިން ފެށިގެން ކަމަށް އައްޑޫ ސިޓީ ކައުންސިލުން ބުނެފި އެވެ.
ކައުންސިލުން މިހެން ބުނީ މިއަދު ކައުންސިލް އިދާރާގައި ބޭއްވި ނޫސް ކޮންފަރެންސެއްގަ އެވެ. އައްޑޫގެ ވިޔަފާރިތަކުން މަހަކު 200ރ. ނަގަން އެންމެ ފުރަތަމަ ނިންމީ ފެބްރުއަރީ މަހުން ފެށިގެންނެވެ. އެހެން ނަމަވެސް މި ނިންމުމާ ގުޅިގެން ބައެއް ފަރާތްތަކުގެ ކަންބޮޑުވުންތަކާ ގުޅިގެން އެކަން ފަސްކޮށް އިކޮނޮމިކް މިނިސްޓްރީގެ ހުއްދައަކަށް ކައުންސިލުން އެދުނެވެ.
މޭޔަރު އަބްދުﷲ ސޯދިގް (ސޯބެ) މިއަދު ވިދާޅުވީ ޖުލައި މަހުން ފެށިގެން ވިޔަފާރިތަކުން 200ރ. ނަގަން ނިންމީ މިނިސްޓްރީން އެކަމާ ގުޅިގެން އެޓާނީ ޖެނެރަލް (އޭޖީ) ގެ ލަފާ ހޯދުމަށް ފަހު، އެކަން ކައުންސިލަށް އެންގުމުން ކަމަށެވެ. އެހެން ނަމަވެސް ގާޑިއާ ވިޔަފާރިތަކުން ކުރިއެކޭ އެއްގޮތަށް ނަގާނީ 50ރ. ކަމަށް ކައުންސިލުން ބުންޏެވެ.
ވިޔަފާރިތަކުން 200ރ. ގެ ފީއެއް ނިންމީ އާބާދީގައި 10،000 ނުވަތަ އެއަށް ވުރެ ގިނަ މީހުން ދިރިއުޅޭ ރަށްރަށުގައި ހުންނަ ކާބޯތަކެތީ ވިއްކާ ތަންތަނުންނާއި އިމްޕޯޓް މުދާ ވިއްކާ ތަންތަނުން 200ރ. ގެ ފީއެއް ނެގޭނެ ކަމަށް "އިމްޕޯޓް މުދާ ވިއްކާ ތަންތަން، ސައި ހޮޓާ އަދި ކެންޓީނާ ބެހޭ ގާނޫނު" ގައި ބަޔާންކޮށްފައިވާތީ އައްޑުއަކީ އާބާދީގައި 30،000 އަށް ވުރެ ގިނަ މީހުން އުޅޭ އަތޮޅަކަށްވާތީ ކަމަށެވެ.
އެގޮތަށް އަމަލު ކުރުމަށް އަންގައި އިކޮނޮމިކް މިނިސްޓްރީގެ ޑިރެކްޓަރު ޖެނެރަލް އުސްމާން ޝާކިރު އެޕްރީލް 29، 2013 ވަނަ ދުވަހު ކައުންސިލަށް ފޮނުވި ސިޓީގައި ބުނެފައި ވަނީ ރާއްޖޭގައި މީހުން ދިރިއުޅޭ ރަށްތައް ކަނޑައެޅުމުގެ ގަރާރުގެ ދަށުމް، ހުޅުދޫ، މީދޫ، ފޭދޫ، މަރަދޫފޭދޫ، މަރަދޫ އަދި ހިތަދޫ ހިމެނޭ ގޮތަށް އައްޑުއަކީ ރަށެއްގެ ގޮތުގައި އޮކްޓޯބަރު 14، 2010 ކަނޑައަޅާފައިވާ ކަމަށެވެ.
"ވީމާ އިސްވެ ދެންނެވުނު ނުކުތާތަކަށް ރިއާޔަތްކޮށް ހުޅުދޫ، މީދޫ، ހިތަދޫ، މަރަދޫ، މަރަދޫފޭދޫ. ފޭދޫގެ އާބާދީގެ ޖުމްލަ އެންމެ ފަހުން އިއުލާންކޮށްފައިވާ ބޯހިމެނި ހިސާބުން ބައްލަވައި 10،000 މީހުން ނުވަތަ އެއަށް ވުރެ ގިނަ މީހުން އައްޑޫ ސިޓީގައި ދިރިއުޅޭ ނަމަ 200ރ. ނަންގަވަމުން ގެންދެވުމަށް ދެންނެވީމެވެ،" ސިޓީގައިވެ އެވެ.
އައްޑުއަކީ ވަކިވަކި ރަށްރަށުގެ ބަދަލުގައި މިހާރު ސިޓީއެއްގެ ގޮތުގައި ބަލާތީ، މުޅި އާބާދީ 10،000 އަށް ވުރެ މަތިވުމުންނެވެ.
އައްޑޫގެ އާބާދީގައި ޖުލައި 2012 އާ ހަމައަށް ތިބީ ޖުމްލަ 31،999 މީހުންނެވެ.