އިނގިރޭސި ޕްރިމިއާ ލީގުގައި މިރޭ ކުޅުނު މެޗުތަކުން ލިވަޕޫލާއި ޓޮޓެންހަމް ހޮޓްސްޕާ މޮޅުވިއިރު ލެސްޓާ ސިޓީ އަތުން ބަލިވެ މެންޗެސްޓާ ސިޓީ ތާވަލްގެ ތިންވަނައަށް ވެއްޓިއްޖެއެވެ.
އަމިއްލަ ދަނޑުގައި 4-0 އިން ނިއުކާސަލް އަތުން ލިވަޕޫލް މޮޅުވިއިރު ޓޮޓެންހަމް ވަނީ ފަސޭހަކަމާއެކު ބޯންމައުތު އަތުން 5-0 އިން މޮޅުވެފައެވެ. އެންމެ ފަހުގެ ޗެމްޕިއަން ސިޓީ ވަނީ 2-1 އިން ލެސްޓާ އަތުން ބަލިވެފައެވެ.
މި ނަތީޖާއާއެކު ލިވަޕޫލް ވަނީ 19 މެޗުން 51 ޕޮއިންޓް ހަމަކޮށް ލީގުގެ އެއްވަނައިގައި ހަ ޕޮއިންޓްގެ ލީޑެއް ނަގައިފައެވެ. ޓޮޓެންހަމް ވަނީ 45 ޕޮއިންޓާއެކު ދެވަނައަށް ޖެހިލައިފައެވެ. ތިންވަނައިގައި އޮތް ސިޓީ އަށް 44 ޕޮއިންޓް ލިބިފައިވާއިރު ހަތަރުވަނައިގައި އޮތް ޗެލްސީ އަށް ލިބިފައިވަނީ 37 ޕޮއިންޓެވެ.
ލިވަޕޫލްގެ އެންފީލްޑްގައި ނިއުކާސަލް އާ ދެކޮޅަށް ކުޅުނު މެޗުގެ ފުރަތަމަ ހާފުގައި އެ ޓީމުން ކާމިޔާބުކުރި ހަމައެކަނި ލަނޑުޖަހައިދިނީ ކްރޮއޭޝިއާގެ ޑިފެންޑަރު ޑޭޔަން ލޮވްރެން އެވެ. މި ހާފު ނިމުނީ 1-0 އިން ލިވަޕޫލް ކުރީގައިއޮވެގެންނެވެ.
މި މެޗުގެ ދެވަނަ ހާފުގެ ކުރީކޮޅު، ލިވަޕޫލަށް ލިބުނު ޕެނަލްޓީއަކުން މުހައްމަދު ސަލާހް އެ ޓީމުގެ ލީޑް ފުޅާކުރިއިރު މެޗުގެ ފަހު 11 މިނެޓުގައި ޒެރްދާން ޝަކީރީ އާއި ފަބީނިއޯ ވަނީ މި މެޗުން އެ ޓީމަށް ބޮޑު މޮޅެއް ހޯދައިދީފައެވެ.
އިނގިރޭސިވިލާތުގެ ވެމްބްލީ ސްޓޭޑިއަމްގައި މިރޭ ކުޅުނު މެޗުގައި ޓޮޓެންހަމް ވަނީ ބޯންމައުތު ކޮޅަށް ލަނޑު ގޯންޏެއް އޮއްސާލައިފައެވެ. މި މެޗުގައި ޓޮޓެންހަމް އިން ކާމިޔާބުކުރި ފަސްލަނޑުގެ ތެރެއިން ދެގޯލް ސޮން ހެއުން-މިން ޖަހައިދިންއިރު އެ ޓީމުގެ އަނެއް ލަނޑުތައްޖަހައިދިނީ ކްރިސްޓިއަން އެރިކްސަން އާއި ލޫކަސް މޯރާ އަދި ހެރީ ކޭން އެވެ. މި މެޗުގައި ޓޮޓެންހަމްގެ ފުލްބެކް ކައިލް ވޯކާ-ޕީޓާސް ވަނީ ތިން ލަނޑުޖެހުމަށް އެހީތެރިވެދީފައެވެ.
ލީގުގައި މިރޭ ކުޅުނު މެޗުގައި ސިޓީ ވަނީ ލެސްޓާ އަތުން 2-1 އިން ބަލިވެ ތާވަލްގެ ދެވަނައިން ތިންވަނަ އަށް ވެއްޓިފައެވެ. މި މެޗުގެ 14 ވަނަ މިނެޓުގައި ބެނާޑޯ ސިލްވާގެ ލަނޑުން ސިޓީ ލީޑްނެގިއިރު އޭގެ ފަސް މިނެޓުފަހުން މާކް އޯލްބްރައިޓަން ވަނީ ލެސްޓާ އަށް އެއްވަރުކޮށްދީފައެވެ. މެޗު ނިމެން 9 މިނެޓަށްވެފައިވަނިކޮށް ރިކާޑޯ ޕެރެއިރާ ވަނީ ލެސްޓާ އަށް ތިން ޕޮއިންޓް ކަށަވަރުކޮށްދީފައެވެ. މިއީ ސިޓީގެ ޕެނަލްޓީއޭރިޔާބޭރުން ފޮނުވާލި ރީތި ހަމަލާއަކުން ޕެރެއިރާ ކާމިޔާބުކުރި ގޯލެކެވެ.