ގިނަ އަދަދެއްގެ މަސްތުވާތަކެއްޗާ އެކު ސ. ފޭދޫން މީހަކު ގަން ޕޮލިސް ސްޓޭޝަނަށް ގެންގޮސްފި އެވެ.
މި މައްސަލަ އާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައި ވަނީ އުމުރުން 23 އަހަރުގެ ފިރިހެނެކެވެ. "އައްޑޫ ލައިވް" އަށް އެނގިފައިވާ ގޮތުގައި ފޭދޫން ހައްޔަރު ކުރީ މީގެ ކުރިން ވެސް މަސްތުވާތަކެތީގެ މައްސަލަތަކެއްގައި ހައްޔަރުކޮށް ދޫކޮށްލާފައިވާ ފޭދޫ ޒުމައްރަދުގޭ އާގޭ އަފްޝީން އަހުމަދު އެވެ.
އޭނާ ފުލުހުންގެ ބެލުމުގެ ދަށަށް ގެންގޮސްފައި ވަނީ ޕޮލިސް އިންޓެލިޖެންސަށް ލިބުނު މަޢުލޫމާތަކާ ގުޅިގެން އިއްޔެ މެންދުރު 12:30 ހާއިރު ޕޮލިސް އިންޓެލިޖެންސާއި އައްޑޫ ސިޓީގައި މަސައްކަތް ކުރާ އެސްއޯ ފުލުހުންގެ އިތުރުން ގަން ޕޮލިސް ސްޓޭޝަން ގުޅިގެން ހިންގި އޮޕަރޭޝަނެއްގައި އޭނާ ދިރިއުޅޭ ގެއިންނެވެ.
ކޯޓް އަމުރެއްގެ ދަށުން ފުލުހުން އޭނާ ދިރިއުޅޭ ގެބަލައި ފާސް ކުރި އިރު މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 511 ސެލޯފިންކޮޅު ވަނީ ފެނިފަ އެވެ.
އައްޑޫގައި މިހާރު ހިންގާ އޮޕަރޭޝަންގެ ތެރޭގައި ފުލުހުން އެކި ދުވަސްމަތިން ވަނީ ގިނަ ޢަދަދެއްގެ މަސްތުވާތަކެތި ހޯދާފަ އެވެ.