"ޖޯލިއަންސް މިކްސް ވޮލީބޯލް ޓޯނަމަންޓް"ގެ ހަތްވަނަ މެޗްގައި ޓީމް އެވަގްރީންއާއި ޓީމް ޓަފް ސިކްސް ބައްދަލު ކުރި މެޗް 2-3 ސެޓުން ޓީމް ޓަފް ސިކްސް ކާމިޔާބު ކޮށްފިއެވެ.
އައްޑޫ ސިޓީ ފޭދޫ ޒުވާނުން އިންތިޒާމު ކޮށްގެން ފޭދޫ ވޮލީ ކޯޓުގައި ބާއްވަމުންގެންދާ، މިމުބާރާތުގެ މެޗްތަކަކީ ވަރަށް ފޯރިގަދަ މެޗްތަކެކެވެ. ގިނައަދަދެއްގެ ސަޕޯޓަރުން މިމުބާރާތުގެ މެޗްތައް ބެލުމަށް ވޮލީކޯޓަށް ޖަމާވެއެވެ.
މިމެޗް ޝަރަފުވެރިކޮށްދެއްވީ އައްޑޫ ސިޓީ ފޭދޫގެ ކައުންސިލަރުކަން ކޮށްދެއްވާފައިވާ އަޙްމަދު މިރްޒާދު އަދި ފުޓްބޯޅައިގެ ދާއިރާއިން ވިދާލި އަންހެން ފުޓްބޯޅަ ކުޅުންތެރިއެއް ކަމަށްވާ އަލްމާ އަލީއެވެ.
މިމެޗްގެ އެންމެ މޮޅު ފިރިހެން ކުޅުންތެރިއަކަށް ހޮވިފައިވަނީ ޓީމް ޓަފް ސިކްސް ގެ ޖޯޒީ ނަމްބަރު 5 އިސްމާއިލް ސާރިމްއެވެ. އަދި އެންމެ މޮޅު އަންހެން ކުޅުންތެރިއަކަށް ހޮވިފައިވަނީ ޓީމް ޓަފް ސިކްސް ގެ ޖޯޒީ ނަމްބަރު 6 އާމިނަތު ތީބާއެވެ.