އިނގިރޭސި ޕްރިމިއާ ލީގުގައި މިރޭ ކުޅުނު މެޗުގައި ސައުތުހެމްޕްޓަން ބަލިކޮށް އެންމެ ފަހުގެ ޗެމްޕިއަން މެންޗެސްޓާ ސިޓީ ވަނީ ލީގު ތާވަލްގެ ދެވަނަ މަގާމަށް ޖެހިލައިފައެވެ. މި މެޗުން ސިޓީ މޮޅުވީ 3-1 އިންނެވެ.
މިއީ ލީގުގައި އެންމެ ފަހުން ކުޅުނު ތިން މެޗުގެ ތެރެއިން ސިޓީ މޮޅުވި ފުރަތަމަ މެޗެވެ. އެ ޓީމު އެންމެ ފަހުން ކުޅުނު މެޗުގައި މިދިޔަ ހަފްތާގެ ބުދަ ދުވަހު ލެސްޓާ ސިޓީ އަތުން 2-1 އިން ބަލިވިއިރު އޭގެކުރީން ކުޅުނު މެޗުގައި އަމިއްލަ ދަނޑުގައި ކްރިސްޓަލް ޕެލަސް އަތުން ބަލިވީ 3-2 އިންނެވެ.
މި މެޗުން ހޯދީ މޮޅާއެކު ސިޓީ ވަނީ ތާވަލްގެ އެންމެ ކުރީގައި އުޅޭ ލިވަޕޫލަށް ވުރެ ހަތް ޕޮއިންޓް ފަހަތުން 20 މެޗުން 47 ޕޮއިންޓް ހަމަކޮށް ދެވަނަ އަށް ޖެހިލައިފައެވެ. ސިޓީ އަށް ދެވަނަ ލިބުނީ ކުރީން އެ މަގާމުގައި އޮތް ޓޮޓެންހަމް ހޮޓްސްޕާ ކުޅުނު މެޗުގައި ވުލްވަހެމްޕްޓަން ވޮންޑަރާސް އަތުން 3-1 އިން ބަލިވުމުންނެވެ. ސިޓީ އަށް ވުރެ ދެ ޕޮއިންޓް ފަހަތުން ޓޮޓެންހަމް ތިންވަނައިގައި އޮތްއިރު ޗެލްސީ ވަނީ 43 ޕޮއިންޓާއެކު ހަތަރުވަނައިގައި ހަމަޖެހިލައިފައެވެ.
ސައުތުހެމްޕްޓަންގެ ދަނޑުގައި ކުޅުނު މި މެޗު ފެށިގެން 10 ވަނަ މިނެޓުގައި ކުރީން ލީޑްނެގީ ސިޓީއިންނެވެ. އެ ޓީމުގެ ބެނާޑޯ ސިލްވާ ތަނަވަސްކުރި ފުރުޞަތަކުން މިލަނޑުޖަހައިދިނީ ޑޭވިޑް ސިލްވާ އެވެ.
މެޗުގެ 37 ވަނަ މިނެޓުގައި ސައުތުހެމްޕްޓަންގެ ކެޕްޓަން ޕިއޭރް-އެމީލް ހޮއިބިއޭ އެ ޓީމަށް ނަތީޖާ ހަމަހަމަކޮށްދިން ނަމަވެސް ފުރަތަމަ ހާފު ނިމުމުގެކުރީން ސިޓީން ވަނީ އިތުރު ދެލަނޑުޖަހައިފައެވެ. އެގޮތުން، މެޗުގެ 45 ވަނަ މިނެޓުގައި ސައުތުހެމްޕްޓަންގެ ޖޭމްސް ވޯޑް-ޕްރައުސް އަތުން ބައިކޮޅަށް ވަން ގޯލަކުން ސިޓީ އިން ދެވަނަ ފަހަރަށް ލީޑްނެގިއިރު މި ހާފުގެ އިތުރުވަގުތުގައި އޮލެކްސެންޑަ ޒިންޗެންކޯ ނަގައިދިން ހުރަހަކުން ލިބުނު ބޯޅައެއް ބޮލުން ގޯލްގެ ތެރެއަށް ވައްދާލައިގެން ސާޖިއޯ އަގުއޭރޯ ވަނީ ސިޓީގެ ލީޑް ފުޅާކޮށްދީފައެވެ. މި ހާފު ނިމުނީ 3-1 އިން ސިޓީ ކުރީގައިއޮވެގެންނެވެ.
ދެވަނަ ހާފުގައި ސިޓީގެ ލީޑް ފުޅާކުރުމަށް އަގުއޭރޯ އާއި ރިޔާދް މާރޭޒް އަށް ވަނީ ރަނގަޅު ފުރުޞަތުތައް ލިބި ބޭނުންހިފޭގޮތްނުވެފައެވެ. އެގޮތުން، މެޗުގެ 59 ވަނަ މިނެޓުގައި ސައުތުހެމްޕްޓަންގެ ޕެނަލްޓީއޭރިޔާތެރޭގައި ހުރެ އަގުއޭރޯ ފޮނުވާލި ބޯޅަ ގޯލްގެ ހުރަސްދަނޑިއަށް އަމާޒުވިއިރު މެޗު ނިމެން 10 މިނެޓަށްވެފައިވަނިކޮށް މާރޭޒް ފޮނުވާލި ބޯޅަ ސައުތުހެމްޕްޓަންގެ ގޯލްކީޕަރު އަލެކްސް މެކާތީ މަތަކުރިއެވެ.
ސައުތުހެމްޕްޓަނުން މި މެޗުގެ ފަހު ފަސް މިނެޓު ކުޅުނީ 10 ކުޅުންތެރިންނާއެކުއެވެ. އެއީ މެޗުގެ 85 ވަނަ މިނެޓުގައި ސިޓީގެ ބްރެޒިލް މިޑްފީލްޑަރު ފެނާންޑީނިއޯ އަށް ކުރި ނުރައްކާތެރި ފައުލަކަށް އެ ޓީމުގެ ހޮއިބިއޭ އަށް ރަތް ކާޑު ދެއްކުމުންނެވެ.
މި މުބާރާތުގައި މިރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ބާންލޭ ވަނީ 2-0 އިން ވެސްޓްހޭމް ޔުނައިޓެޑް ބަލިކޮށްފައެވެ. މި މެޗުގައި ބާންލޭގެ ލަނޑުތައް ޖަހައިދިނީ ކްރިސް ވުޑް އާއި ޑްވައިޓް މެކްނީލް އެވެ.
ލީގުގައި ސިޓީ ދެން ކުޅޭ މެޗުގައި އަންނަ ހުކުރު ދުވަހު ނިކުންނާނީ ތާވަލްގެ އެއްވަނައިގައި އުޅޭ ލިވަޕޫލް އާ ދެކޮޅަށެވެ. ސިޓީގެ އެތިހާދު ސްޓޭޑިއަމްގައި ކުޅޭ މި މެޗު ފަަށާނީ ރާއްޖޭގަޑިން ދަންވަރު 01:00 ގައެވެ.