ބޮލީވުޑް ފިލްމުތަކުން ތަފާތު ކެރެކްޓާތަކުން ފެނިގެން ގޮސްފައިވާ އެކްޓަރު ކާދަރް ޚާން މަރުވެއްޖެ ކަމަށް ދެކެވޭ ވާހަކަތައް އޭނާގެ ދަރިފުޅު ސަރްފަރާޒް ދޮގު ކޮށްފިއެވެ.
އެވާހަކަތައް ދޮގު ކުރަމުން ސަރްފަރާޒް ބުނެފައިވަނީ އޭނާގެ ބައްޕަ ވަނީ ކެނެޑާގެ ހޮސްޕިޓަލެއްގައި އެޑްމިޓް ކުރެވިފައި ކަމަށެވެ.
81 އަހަރުގެ އެކްޓަރު ވަނީ ނޭވާލުމަށް ދަތިިވުމުގެ ސަބަބުން ވެންޓިލޭޓަރުގައި ބާއްވާފައެވެ. ރިޕޯޓްތައް ބުނާގޮތުން ކާދަރް ޚާން އަށް ޖެހިފައިވަނީ "ޕްރޮގްރެސިވް ސްޕްރެނުކްލިއަރ ޕެލްސީ" ކިޔާ ބައްޔެކެވެ. އެ ބަލި ޖެހުމުގެ ސަބަބުން ކޮއްޅަށް ނުހުރެވެއެވެ. ބެލެންސް ކެޓުމުގެ އިތުރަށް ހިނގާ ވެސް ނޫޫޅެވެއެވެ.
މަޝްހޫރު ފިލްމް ސްޓާރ އަމީތާބް ބައްޗަން ވަނީ ކާދަރް ޚާން އަށް އަވަސް ޝިފާއަކަށް އެދިފައެވެ. ޓްވިޓާގައި ކޮށްފައިވާ މެސެޖްގައި ކާދަރް ޚާންގެ ޝަޚްސިއްޔަތަށް އަމީތާބް ވަނީ ތައުރީފް ކޮށްފައެވެ.
އަމީތާބް އާއިއެކު ކާދަަރް ޚާން ވަނީ ގިނަ ފިލްމް ތަކެއް ކުޅެފައެވެ. އޭގެ ތެރޭގައި "ދޯ އޮއުރު ދޯ ޕާންޗް"، "މުގައްދަރްކާ ސިކަންދަރް". "މިސްޓަރ ނަޓްވަރްލާލް"، "ސުހާގް"، "ކޫލީ" އަދި "ޝެހެންޝާހް" ފަދަ ފިލްމްތައް ހިމެނެއެވެ.