އެކްޓަރު އަދި ލިޔުންތެރިޔާ ކާދަރް ޚާން އުމުރުން 81 އަހަރުގައި ދިގުމުއްދަތެއްގައި ބަލިވެ އުޅުމަށްފަހު 31 ޑިސެމްބަރު 2018 ވަނަ ދުވަހު މަރުވެއްޖެއެވެ.
މީގެ ކުރިން ވެސް ވަނީ ކާދަރް ޚާން މަރުވިކަމުގެ ޚަބަރުތައް ފެތުރިފައެވެ. އެހެން ނަމަވެސް އެ ފަހަރު ކާދަރްގެ ދަރިފުޅު ސަރްފަރާޒް ވަނީ އެ ޚަބަރު ދޮގުކޮށްފައެވެ. ނަމަވެސް މި ފަހަރުގެ ޚަބަރު އޭނާގެ ދަރިފުޅު ވަނީ ޔަގީންކޮށްދީފައެވެ.
"އަހަރެންގެ ބައްޕަ އަހަރުމެންނާއި ވަކިވެ ގޮސްފި. ބައްޕަ މަރުވެފައިވަނީ 31 ޑިސެމްބަރުގެ ހަވީރު ކެނެޑާ ގަޑިން 6 ޖެހިއިރު." ސަރްފަރާޒް ބުނެފައިވެއެވެ. ސަރްފަރާޒް ބުނެފައިވާ ގޮތުގައި އެ ދުވަހުގެ މެންދުރު އޭނާގެ ބައްޕަ ވަނީ ކޯމާއަކަށް ގޮސްފައެވެ.
ކާދަރް ޚާން މަރުވީ ކެނެޑާގެ ހޮސްޕިޓަލެއްގައި ވެންޓިލޭޓަރުގައި އޮންނަތާ ދުވަސްތަކެއް ފަހުންނެވެ. ސަރްފަރާޒް ބުނެފައިވާ ގޮތުގައި އާއިލާގެ މީހުންވެސް ކެނެޑާގައި ތިބުމާއެކު ކާދަރް ޚާންގެ ކަށުކަމާކެމީގެ ކަންތައް ކުރިޔަށް ގެންދިޔުމަށް ހަމަޖެހިފައިވަނީ ކެނެޑާގައެވެ.
ކާބުލް އަށް އުފަން ކާދަރް ޚާން އޭނާގެ ފުރަތަމަ ފިލްމް ކުޅެފައިވަނީ 1973 ވަނަ އަހަރުއެެވެ. އެއީ ރާޖޭޝް ކަންނާގެ ފިލްމް "ދާގް"އެވެ. އޭގެ ފަހުން މިހާތަނަށް އޭނާ ވަނީ 300 އަށްވުރެ ގިނަ ފިލްމްތަކުން ފެނިގެން ގޮސްފައެވެ.
ކާދަރް ޚާން މަރުވި އިރު އޭނާގެ 3 ކުދިން ދުނިޔޭގައި އެބަތިއްބެވެ. އެއީ ސަރްފަރާޒް ޚާން، ޝާހްނަވާޒް ޚާން އަދި ޤުއްދޫސް ޚާންއެވެ.