މިމަހުގެ 15 ވަނަ ދުވަހު މަރަދޫން ބާރުގެ ބޭނުންކޮށްގެން ހައްޔަރުކުރި 7 ޒުވާނުން މިރޭ ހިތަދޫ މެޖިސްޓްރޭޓް ކޯޓުން ދޫކޮށްލައިފިއެވެ.
ކޯޓުގައި މިރޭ އޮތް ޝަރީއަތުގައި 5 މީހަކު ފުލުހުންގެ ބެލުމުގެ ދަށުގައި ބެހެއްޓުމަށް އިތުރު މުއްދަތެއް ޖަހައިދިނުމަށް ކޯޓުގައި ފުލުހުން އެދުނެވެ. ފުލުހުން ބުނީ އެ 5 މީހުން ދޫކޮށްލައިފިނަމަ ފުލުހުންގެ ފުރާނައަށް ނުރައްކާކަމަށެވެ. އެގޮތުން މިހާރުވެސް ސިފައިންގެ ދެމީހަކަށް ބަޔަކު އަނިޔަކޮށްފައިވާކަމަށެވެ.
ފުލުހުން މިގޮތަށް އެދުމާއި ގުޅިގެން މައްސަލަ ބެއްލެވި ގަޒީ ވަނީ ސިފައިންނަށް ހަމަލާ ދިނީ މި ޒުވާނުން ތޯ ސުވަލުކޮށްފައެވެ. ޖަވާބުގައި ފުލުހުން ބުނީ ސިފައިންނަށް ހަމަލަ ދިނީ މި ޒުވާނުން ނޫންކަމަށެވެ.
އެގޮތަށް ފުލުހުން ބުނުމުން ގަޒީ ވަނީ އެ އެންމެން ބަންދުން ދޫކޮށްލާފައެވެ.
މި މަހުގެ 15 ވަނަ ދުވަހު ފުލުހުން މި ޒުވާނުން ހައްޔަރު ކުރުމުގައި އަމަލްކޮށްފައިވަނީ ގާނޫނާއި ހިލާފަށް ކަމަށް ދާދި ފަހުން ހޯމް މިނިސްޓަރުކަމުން ވަކިކުރެއްވި ޑރ. މުހައްމަދު ޖަމީލް އަހުމަދު ވަނީ ވިދާޅުވެފައެވެ. އަދި ފުލުހުން ކުރި އަނިޔާ ބެލުމަށް ހާއްސަ ޓީމެއް އައްޑޫގައި ހަރަކާތްތެރިވި އިރު ފުލުހުން ވަނީ އެސަރަހައްދުގައި ގިނަ އަދަދެްގެ އަންހެނުންނާއި ކުޑަކުދިން ތިއްބައި ޕެޕަރ ސްޕްރޭ ޖަހާފައެވެ.