ސ. ގަން އިންޓަނޭޝަނަލް އެއާޕޯޓްގެ މަޝްރޫއު ދަނީ ދިވެހި ރައްޔިތުންނަށް އެންމެ ފައިދާ ހުރި ގޮތަށް ނޫން ކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެ އެވެ.
އެމަނިކުފާން މިހެން ވިދާޅުވީ ރޭ ޖުމްހޫރީ ޕާޓީން ހއ. ކެލާގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ޤާސިމް ވިދާޅުވީ މިހާރު ގަމުގެ އެއާޕޯޓްގެ 30 އިން ސައްތަ ހިއްސާ ޗަމްޕާ ހުސައިން އަފީފުގެ ކާސާ ހޮލްޑިން އަށް ވިއްކާލައި އަދި އެ ބަޔަކު ބޭރު ބަޔަކަށް އެތަން ވިއްކާލުމުން މުޅި އުމުރަށް ވެސް ގެއްލުން ވެގެންދާނެ ކަމަށެވެ.
"މިހާރު އެ ބުނާ ޗަމްޕާ ބްރަދާސްއަކަށް ނުވަތަ އެބުނާ ކުންފުންޏަކަށް މިއަދު 30 އިން ސައްތައް އެހެރަ ވިއްކާލަނީ. ދެން އެތަން ވިއްކާލާނީ ބޭރުގެ އެހެން ބަޔަކަށް. ވިއްކާލީމާ މުޅި އުމުރަށް ގެއްލިގެން އެދިޔައީ އެތަން. އަޅުގަނޑު ބުނަންވީތޯ އެވެސް ރަނގަޅޭ. ނޫން. އެއްގޮތަކަށް ވެސް އަޅުގަނޑު ނުބުނާނަން އެ ރަނގަޅެކޭ. އަޅުގަނޑު އޭރު ބުނި ވާހަކަ މިއަދު އެ ރިޕީޓްކޮށް ތި ބޭފުޅުން ޓީވީން ދައްކާލީމާ އަޑު އިވޭނެ. މިހާރު އެކަންތައްތައް އެ ދަނީ." އައްޑޫގެ ރައްޔިތުންނަށް މިހާރު އެ ލިބުނީ ވަރަށް މޮޅު އެއްޗެއްތޯ ސުވާލު އުފައްދަމުން ޤާސިމް ވިދާޅުވި އެވެ.
ގަން އެއާޕޯޓް ހިންގާ އައްޑޫ އިންޓަނެޝަނަލް އެއާޕޯޓް (އޭއައިއޭ) އިން އެއާޕޯޓްގެ މަޝްރޫއު ކުރިއަށް ގެންދަން އުޅޭ ގޮތާ ދޭތެރޭ ހިތްހަމަނުޖެހިގެން ގާސިމް ވަނީ މީގެ ކުރިން ވެސް ތަކުރާރުކޮށް ވާހަކަ ދައްކާފަ އެވެ.
އޭނާ ވިދާޅުވީ ރަންވޭ ދިގު ކުރުމަށް ބޭނުންވާ ބިން އޭނާ އަމިއްލަ ގޮތުން ވެސް ޑްރެޖަރަށް ފޮނުވައިގެން ހިއްކައި ދީފާނެ ކަމަށެވެ.