ރާއްޖޭގެ ކުދި އަދި މެދުފަންތީގެ ވިޔަފާރިތައް ތަރައްޤީ ކުރުމަށް އުފައްދާ "އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން"ގައި 5 އިންސައްތަ ހިއްސާވުމަށް ނިންމައި، އައްޑޫ ސިޓީ ކައުންސިލް އިން ޤަރާރެއް ފާސްކޮށްފި އެވެ.
އެ ޤަރާރުގައި ބުނެފައި ވަނީ އެސް.އެމް.އީ ބޭންކް ހިންގުމަށް އުފައްދާ "އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން" ގައި %5 ހިއްސާގައި ކައުންސިލުން ބައިވެރިވުމަށް ފެންނަ ކަމަށާއި، އެސް.އެމް.އީ ބޭންކް ހިންގުމުމުގައި، މުއައްސިސެއްގެ ހައިސިއްޔަތުން އައްޑޫސިޓީ ކައުންސިލްގެ ފަރާތުން ކުރަން ޖެހޭ އިދާރީ އަދި ޓެކްނިކަލް ކަންކަމާއި ގުޅިގެން، އެންމެހާ މުޢާމަލާތުތައް ކުރައްވާނީ ކައުންސިލްގެ މަޝްވަރާގެ މަތިން މޭޔަރ ޢަބްދުﷲ ޞާދިޤް ކަމަށް ކަނޑައަޅާފައިވާ ކަމަށެވެ.
އެ ޤަރާރު ފާސްކޮށްފައި ވަނީ މިދިޔަ ބުދަ ދުވަހު ބޭއްވުނު އައްޑޫ ސިޓީ ކައުންސިލްގެ ތިންވަނަ ދައުރުގެ 13 ވަނަ ކުއްލި ޖަލްސާގައި ބައިވެރިވި ހުރިހާ މެމްބަރުންގެ އިއްތިފާޤުންނެވެ.
އެސް.އެމް.އީ ބޭންކްގައި ރާއްޖޭގެ ތިން ސިޓީގެ ވެސް ހިއްސާ އޮންނާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވީ މިދިޔަ ޑިސެމްބަރ މަހުގެ 29 ވަނަ ދުވަހުގެ ރޭ ގެސްޓްހައުސް ސިމްޕޯސިއަމް ނިންމުމުގެ ގޮތުން ދަރުބާރުގޭގައި ބޭއްވެވި ރަސްމިއްޔާތުގައި ވާހަކަފުޅުދައްކަވަމުންނެވެ.
އެމަނިކުފާނު ވިދާޅުވިގޮތުގައި، އެސް.އެމް.އީ ބޭންކަކީ ދިވެހި ތާރީޚްގައި ވެސް މީގެ ކުރިން އުފައްދާފައި ނުވާފަދަ ގޮތަކަށް، ސިޓީ ކައުންސިލްތަކުގެ ޙިއްޞާއާ އެކު އުފެދޭނެ ބޭންކެއް ކަމަށެވެ. އަދި މި ބޭންކު ވެގެންދާނީ، ދިވެހީންގެ މާލީ ތަނަވަސްކަމާ އިޤްތިޞާދީ ފުދުންތެރިކަން އިތުރު ކުރުމުގައި، ވިޔަފާރިވެރިންނާއި ސަރުކާރު އަތުގުޅާލުމަށް ޤާއިމްކުރެވޭ މާލީ އިދާރާއެއްގޮތުގައި ރައީސް ސިފަކުރެއްވިއެވެ.