ފީނައިގެން ޑީކޯ ވާ ފަރާތްތަކަށް ފަރުވާ ދިނުމަށޤ ޑީޓޮކްސް ސެންޓަރެއް ގާއިމްކުރުމާ ގުޅޭގޮތުން ނޭޝަނަލް ޑްރަގް އޭޖެންސީ(އެންޑީއޭ) އާ އައްޑޫ ސިޓީ ކައުންސިލުން މަޝްވަރާކޮށްފިއެވެ.
މިއަދު ހެނދުނު ބޭއްވި މި ބައްދަލުވުމުގައި އައްޑޫ ސިޓީ މޭޔަރ އަބްދުﷲ ސޯދިގް ބައިވެރިވެވަޑައިގެންނެވިއެވެ. ދެކުނުގައި ޑީޓޮކްސް ސެންޓަރެއް އައްޑޫގެ ޝަންގްރިލާ ވިލިނގިލި ރިސޯޓުގައި ގާއިމުކުރެވިފައިވި ނަމަވެސް އެ ސެންޓަރުގެ ޚިދުމަތް މެދުކަނޑާލަން އުޅޭކަމުގެ ޚަބަރު މިދިޔަ އަހަރު ތެރޭ ވަނީ ފެތުރިފައެވެ.
މަސްވެރިން އެން ހިފަން ފީނައިގެން ޑީކޯވެ ހާލު ދެރަވެ މާލެ ގެންދަން ޖެހޭއިރު ދާދި ފަހުން ވެސް ވަނީ މަސްވެރިޔަކު ޑީކޯވެ މަރުވެފައެވެ.
ފީނަން ކަނޑައެޅިފައި އޮންނަ ފުން މިނަށްވުރެ އަޑިއަށް ފީނައި، އަޑީގައި އޮންނަން ޖެހޭ ވަގުތަށް ވުރެ ގިނައިރު ފީނުމަށް ފަހު މާ އަވަހަށް މައްޗަށް އެރުމުން ޑީކޯވެ ނުރައްކާތަކާ ކުރިމަތިލާން ޖެހެއެވެ.