ގަބޮންގެ އަސްކަރިއްޔާއިން ސަރުކާރު ބަޣާވާތަކުން ވައްޓާލަން ރާވާފައިވާކަން އިއުލާންކޮށް ސަރުކާރުގެ މީޑިޔާ ހިސޯރުކޮށްފިއެވެ.
ރޭ ދަންވަރު ސިފައިންގެ އޮފިސަރުން އެންމެ ފުރަތަމަ ދައުލަތުގެ ރޭޑިއޯ ސްޓޭޝަން ހިފައި، އެއަށް ފަހު ޓީވީ ސްޓޭޝަން ހިސޯރުކުރިއެވެ. އަދި ދެ އޮފިސަރުން ބަޑި ހިފައިގެން ތިބެ، ސަރުކާރުގެ ކޮންޓްރޯލް އަސްކަރިއްޔާއިން ނަގާފައިވާ ކަން ލައިވް ޓީވީގައި އިއުލާންކުރިއެވެ.
އަސްކަރިއްޔާ އިން ބުނެފައިވަނީ މިބަދަލު ގެންނަން ޖެހުނީ ސަރުކާރު ފެއިލްވެ ޑިމޮކްރަސީ ގައުމުގައި އަލުން އިއާދަ ކުރުމަށް ކަމަށެވެ. ޓައިމް ނޫހުން ރިޕޯޓުކޮށްފައިވާ ގޮތުގައި ގައުމުގެ މަގުތަކުގައި ހަތިޔާރު އެޅި ސިފައިން ހަރަކާތްތެރިވަމުން އަންނަ ކަމަށާއި އަސްކަރީ ޓޭންކުތައް ރަށްފުށަށް ކައިރިކޮށްފައިވާ ކަމަށެވެ.
ގަބޮންގެ ރައީސް، އަލީ ބޮންގޯ ނިމިގެން ދިޔަ އަހަރުގެ އޮކްޓޯބަރު މަހުން ފެށިގެން ގައުމުގައި ނޫޅުއްވައެވެ. ޚަބަރު ލިބޭ ގޮތުގައި ރައީސް ގައުމުން ބޭރަށް ވަޑައިގެންނެވީ ސްޓްރޯކެއް ޖެހިގެން އިތުރަށް ފަރުވާ ހޯއްދެވުމަށް މޮރޮކޯއަށެވެ.