ދުނިޔޭގެ އެކި ޤައުމުތަކުގެ ފުލުހުންގެ މުއައްސަސާތަކުގެ އެންމެ އިސް ވެރިން ހިމެނޭ ބައިނަލް އަޤުވާމީ ޖަމްޢިއްޔާ ކަމަށްވާ "ދަ އިންޓަނޭޝަނަލް އެސޯސިއޭޝަންސް އޮފް ޗީފްސް އޮފް ޕޮލިސް(އައިއޭސީޕީ) ގެ މެމްބަރުކަން ކޮމިޝަނަރު އޮފް ޕޮލިސް ޢަބްދުﷲ ރިޔާޒަށް ލިބިވަޑައިގެންފި އެވެ.
މިއީ ދިވެހި ފުލުހުންގެ އިސް ވެރިއަކަށް މި މަޤާމު ލިބުނު ފުރަތަމަ ފަހަރެވެ.
އެމެރިކާގައި ހުންނަ އިންޓަނޭޝަނަލް އެސޯސިއޭޝަންސް އޮފް ޗީފްސް އޮފް ޕޮލިސްގެ މައި އިދާރާގައި ހުންނަ މި ޖަމާޢަތުގައި ދުނިޔޭގެ އެކި ކަންކޮޅުތަކުން 20،000 އަށް ވުރެ ގިނަ މެމްބަރުން ހިމެނެ އެވެ. މި ޖަމާޢަތް އުފެދިފައި ވަނީ 1893 ވަނަ އަހަރު އެވެ.
މި ޖަމާޢަތުގެ މެމްބަރެއްގެ ގޮތުގައި ރިޔާޒް ހަމަޖެހިގެން ގޮސްފައި މި ވަނީ ކޮމިޝަނަރު އޮފް ޕޮލިސްގެ މަޤާމަށް ވަޑައިގަތުމަށް ފަހު ދިވެހި ފުލުހުންގެ މުއައްސަސާ ކުރިއަރުވައި ތަރައްޤި ކުރުމަށް ގިނަ ގުނަ މަސައްކަތްތަކެއް ކުރައްވަމުން ގެންދަވާ ދަނޑިވަޅެއްގަ އެވެ.
ޚާއްޞަ ގޮތެއްގައި ފުލުހުންނަކީ ރައްޔިތުންގެ ސަލާމަތާއި ރައްކާތެރިކަމަށް އިސް ކަންދީގެން ރައްޔިތުންނަށް ޚިދުމަތް ދިނުމުގައި ޕްރޮފެޝަަނަލް ކަމާއެކު ޙަރަކާތްތެރިވާ ބައެއްގެ ގޮތުގައި ހެދުމަށް ގިނަގުނަ މަސައްކަތްތަކެއް ކުރައްވަމުންދާ ދަނޑިވަޅެއްގައި ކަމަށް ފުުހުންގެ އިދާރާ އިން ބުނެ އެވެ.
ދިވެހި ފުލުހުންގެ މުއައްސަސާ ތަރައްޤީ ކުރައްވައި ކުރިއެރުވުމަށް ރިޔާޒުގެ ލީޑަޝިޕްގައި ވަނީ ރާއްޖޭން ބޭރުގެ ފަރާތްތަކާ އެކު ވަރަށް ބޮޑު ގުޅުމެއް އުފައްދަވައި ގިނަ މަސައްކަތްޕުޅުތަކެއް ކުރައްވާފަ އެވެ.
އެގޮތުން ފުލުހުންގެ މުއައްސަސާ ހަރުދަނާ ކުރުމަށް ބޭނުންވާ ތަފާތު ދާއިރާތަކުން ފަންނީ ބޭފުޅުން ރާއްޖެ ގެނެސް އެ ބޭފުޅުންގެ ހޯދުންތަކާ އެކު ހެޔޮ ބަދަލުތައް ގެނައުމުގެ މަސައްކަތް ވަނީ ފަށްޓަވާފަ އެވެ. މިއާ އެކު ފުލުހުންނަށް ދެވޭ ތަމްރީތައް އިތުރުކޮށް ބޭރު ޤައުމުތަކުގެ ފުލުހުންނާއެކު މަސައްކަތްކޮށް ތަޖުރިބާ ހޯދުމަށް ކުރަމުންދާ މަސައްކަތުގެ ތެރެއިން ގިނަ ޢަދަދެއްގެ ފުލުހުން މި މުއްދަތުގައި ރާއްޖޭން ބޭރަށް ފޮނުއްވައި ތަމްރީނު ދެއްވައި ދުނިޔޭގެ ބައެއް ޔުނިވަސިޓީގެ އެހީތެރިކަން ދަނީ ހޯއްދަވަމުންނެވެ.
ހަމަ މިއާ އެކު އިންސްޓިޓިއުޓް ފޮ ސެކިއުރިޓީ އެންޑް ލޯއެންފޯސްމަންޓް ސްޓްޑީޒް (އައިލްސް) ކޮލެޖް ދަރަޖައިގައި އުފައްދަވައި ރާއްޖޭގައި ފުލުހުންނަށް ފުލުހުންގެ މުއައްސަސާ އިން ޑިގްރީ ފެންވަރަށް ކިޔެވުމުގެ ފުރުޞަތު ވަނީ ފަހިކޮށް ދެއްވާފަ އެވެ.
މީގެ އިތުރުން އައިލްސް އަކީ އިންޓަނޭޝަނަލް ޕޮލިސް އެކަޑަމީ އެސޯސިއޭޝަން (އިންޓަޕާ) ގެ މެމްބަރެއްގެ ދަރަޖަ ހޯދާފައި ވަނީ ވެސް މި މުއްދަތުގެ ތެރޭ ގައެވެ.