އާދަމް ޝަރީފް ވެސް ޕީއެންސީ އަށް ސޮއިކުރައްވައިފި

ޕީޕީއެމް ކައުންސިލް މެމްބަރ އަދި ކުރީގެ ޑިފެންސް މިނިސްޓަރ އާދަމް ޝަރީފް އުމަރު، ކުރީގެ ރައީސް އަބްދުﷲ ޔާމީން އިސްކޮށް ހުންނަވައިގެން އުފައްދާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ސޮއިކުރައްވައިފިއެވެ.

މިކަން އިއުލާންކޮށްފައި ވަނީ މީގެކުރިން ޕީޕީއެމްގެ ނައިބު ރައީސް ކަމުގެ މަގާމުގައި ހުންނެވި ފޮނަދޫ ދާއިރާގެ މެމްބަރު އަބްދުލްރަހީމް އަބްދުﷲ (އަދުރޭ) ކުރެެއްވި ޓްވީޓެއްގަ އެވެ.

އާދަމް ޝަރީފްގެ އިތުރުން ކުރީގެ އިކޮނޮމިކް މިނިސްޓަރ، މުހައްމަދު ސައީދު ވެސް ވަނީ މިރޭ ޕީއެންސީ އާއި ގުޅިވަޑައިގެންފަ އެވެ.

މީގެ އިތުރުން އަދުރޭ ވަނީ ޕީޕީއެމުން ވަކިވެ ވަޑައިގެން ޕީއެންސީ އަށް ސޮއިކުރައްވާފައެވެ. އަދުރޭ އަކީ ޕީއެންސީ އުފެއްދުމުގައި އެންމެ އިސްކޮށް ހުންނެވި އެއް ފަރާތެވެ.

ޕީއެންސީ އުފެއްދުމުގެ ހުއްދަ މިދިޔަ މަހުގެ ފަހުކޮޅު އިލެކްޝަންސް ކޮމިޝަނުން ދީފައިވާއިރު، އެ ޕާޓީ އަށް މިހާތަނަށް 3000 އަށް ވުރެ ގިނަ މެމްބަރުން ސޮއިކުރައްވާފައިވާ ކަމަށް ޕީއެންސީން ބުނެއެވެ.

ޕާޓީއެއް ރަޖިސްޓްރީކޮށް ދެނީ 3،000 މެމްބަރުންގެެ ފޯމާ އެކު ހުށަހެޅުމުން ޕާޓީ އުފެއްދުމުގެ ޖަލްސާއަށް ފަހުއެވެ.

އާ ޕާޓީއެއް އުފެއްދުމުގެ މަސައްކަތް ކުރީގެ ރައީސް ޔާމީން ފެއްޓެއްވީ ޕީޕީއެމްގެ ލީޑަޝިޕާއި ގުޅޭ މައްސަލައެއް ސުޕްރީމް ކޯޓަށް ހުށަހަޅާފައިވާތީ އެ މައްސަލަ ޕީޕީއެމްގެ މިހާރުގެ ލީޑަޝިޕާއި ދެކޮޅަށް ނިމިދާނެ ކަމަށް ބެލެވޭތީއެވެ.