ރައީސުލްޖުމްހޫރިއްޔާގެ ނައިބު ފައިސަލް ނަސީމްއާއި އެ މަނިކުފާނުގެ އާއިލާ، ހިލާލީގެއަށް ބަދަލުވެ ވަޑައިގެންފިއެވެ.
އެ މަނިކުފާނު ހިލާލީގެ އަށް ބަދަލުވެވަޑައި ގަތީ ހޯމަ ދުވަހު ހަވީރުގެ ވަގުތެއްގައެވެ. 2018 އަހަރުގެ ނޮވެމްބަރުމަހު މަގާމުގެ ހުވާ ކުރައްވާފައިވާ ނައިބު ރައީސް އާއި އާއިލާ ދިރިއުޅުއްވުމަށް ދައުލަތުން ހަމަޖެއްސެވި ގެކޮޅަށް ބަދަލުވެ ވަޑައިގެންނެވިފައި މިވަނީ މަގާމާ ހަވާލުވެވަޑައިގެންނެވިތާ ދެ މަހެއްހާ ދުވަސްވާން ކައިރިވެފައިވަނިކޮށެވެ.
ހިލާލީގެއަށް ފައިސަލް ނަސީމް ބަދަލުވެ ވަޑައިގަތީ އެގެއަށް ބަދަލުތައް ގެނެސް މަރާމާތު ކުރުމަށްފަހު އެވެ. ރައީސުލްޖުމްހޫރިއްޔާގެ ނައިބުގެ ރަސްމީ ގެކޮޅަށް މި އަހަރު ހަރަދު ކުރުމަށް ބަޖެޓްކޮށްފައި ވަނީ 2.5 މިލިއަން ރުފިޔާއެވެ. ރައީސް ސޯލިހު ދިރިއުޅުއްވާ ރަސްމީ ގެކޮޅަށް މިއަހަރު ހަރަދު ކުރުމަށް ބަޖެޓްކޮށްފައި ވަނީ 31.5 މިލިއަން ރުފިޔާއެވެ.
އެމްޑީޕީގެ ފުރަތަމަ ވެރިކަމުގައިވެސް ރައީސުލްޖުމްހޫރިއްޔާ މުލީއާގޭގައި ދިރިއުޅުއްވާފައިވާއިރު ނައިބު ރައީސް ދިރިއުޅުއްވާފައިވަނީ ހިލާލީގޭގައެވެ.
ރައީސް އިބްރާހިމް މުހައްމަދު ޞާލިހް މުލީއާގެއަށް ބަދަލުވެވަޑައިގެންފައިވަނީ މިދިޔަ އަހަރުގެ ނޮވެމްބަރުމަހުގެ 30 ވަނަ ދުވަހުއެވެ.