ސައުދީ އަރަބިއްޔާއަށް ނިސްބަތްވާ ރަހަފް އަލް ޤުނޫން، ގައުމުން ފިލައިގެން ތައިލެންޑުގެ ބެންކޮކަށް ދިއުމުން އަނބުރާ ގައުމަށް ފޮނުވާލަން އުޅުމުން އދ. އިން އޭނާއަށް ހިމާޔަތް ދީފިއެވެ.
އުމުރުން 18 އަހަރުގެ ރަހަފް ސައުދީ އިން ފިލީ އޭނާގެ ފުރާނައަށް ނުރައްކާ ވެދާނެތީ ކަމަށް ސޯޝަލް މީޑިޔާގައި ބުނެފައިވެއެވެ. އަދި ސައުދީ އިން "ސަލާމަތްވުމަށް" ބޭނުންވާ ކަމަށް ބުނެފައިވެއެވެ. ނަމަވެސް ބެންކޮކް އެއާޕޯޓުން ވަނީ އޭނާ ތައިލެންޑުން ޑީޕޯޓުކޮށް އަލުން ސައުދީއަށް ފޮނުވުމަށް މަސައްކަތް ކޮށްފައެވެ.
އޭނާ ޓުވިޓާގައި ކުރި ޕޯސްޓެއްގައި ބުނެފައިވަނީ އެނބުރި ގައުމަށް ފޮނުވާލައިފިނަމަ އާއިލާއިން އޭނާ މަރާލާނެ ކަމަށެވެ. އަދި ކުވެއިތު އެއާޕޯޓުގައި އޭނާގެ ބޭބެއިން ބަލާ ގޮސް ތިބޭނެ ކަމަށާއި ސަލާމަތެއް ނުވެވޭނެ ކަމަށް ބުނެފައިވެއެވެ.
ސޯޝަލް މީޑިޔާގައި ގިނަ ބަޔަކު އޭނާގެ ސަލާމަތާ މެދު ކަންބޮޑުވުން ފާޅުކޮށް އިންސާނީ ހައްގުތަކާ ބެހޭ ޖަމިއްޔާތަކުގެ ސަމާލުކަމަށް މައްސަލަ ގެނައުމުން، އދ. ގެ ރެފިއުޖީ އޭޖެންސީ އިން ވަނީ ރަހަފްއާ މުއާމަލާތުކޮށް އދ. ހިމާޔަތުގެ ދަށަށް ގެންގޮސްފައެވެ. ތައިލެންޑު އެއާޕޯޓުން ބުނެފައިވަނީ ރަހަފް ވަނީ އދ. ގެ އޮފިޝަލުންނާއެކު މިހާރު އެޖެންސީއަށް ގޮސްފައި ކަމަށެވެ.
ތައިލެންޑު މެދުވެރިކޮށް އޮސްޓްރޭލިއާ އަށް ދަތުރުކުރަން އުޅެނިކޮށް އެއާޕޯޓުން އޭނާ ހިފެހެއްޓީ ސައުދީ އިމިގްރޭޝަނުން އަންގައިގެންނެވެ.