މިދިޔަ އަހަރު އަތޮޅުތެރެއިން ފުލުހުންނަށް އެންމެ ގިނައިން މައްސަލަ ހުށަހަޅާފައި ވަނީ އައްޑޫ ސިޓީން ކަމަށް ފުލުހުންގެ ތަފާސް ހިސާބުތަކުން ދައްކައިފި އެވެ.
ނިމިގެންދިޔަ 2018 ވަނަ އަހަރު އަތޮޅު ތެރެއިން އެންމެ ގިނަ މައްސަލަތައް ފުލުހުންނަށް ހުށަހަޅާފައި ވަނީ އައްޑޫ ސިޓީ އިން ކަމަށް ފުލުހުން ބުނެފި އެވެ.
މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ފުލުހުންގެ ތަރުޖަމާނު، ޗީފް އިންސްޕެކްޓަރ އޮފް ޕޮލިސް އިޒްމިއާ ޒާހިރު ވިދާޅުވީ މިދިޔަ އަހަރު 14،811 މައްސަލައެއް ފުލުހުންނަށް ހުށަހަޅާފައިވާއިރު، އޭގެ ތެރެއިން މާލެ ފިޔަވައި އަތޮޅުތެރޭގެ ރަށްތަކުން 4،460 މައްސަލަ ހުށަހަޅާފައިވާ ކަމަށެވެ. އަދި އޭގެ ތެރެއިން އެންމެ ގިނަ މައްސަލަތައް ހުށަހަޅާފައި ވަނީ އައްޑޫ ސިޓީ އިން ކަމަށާއި، އެގޮތުން އައްޑޫ އިން އެކަނި 843 މައްސަލަ ހުށަހަޅާފައިވާ ކަމަށް ފުލުހުން ބުނެއެވެ. އެއީ 2017 ވަނަ އަހަރާއި އަޅާ ބަލާއިރު، 87 މައްސަލަ އިތުރު އަދަދެކެވެ.
މިދިޔަ އަހރު އެންމެ މަދުން މައްސަލަ ހުށަހަޅާފައި ވަނީ ވ. އަތޮޅުންނެވެ. އެގޮތުން ވ. އަތޮޅުން މިދިޔަ އަހަރު ޖުމްލަ 28 މައްސަލައެއް ވަނީ ހުށަހަޅާފައެވެ.