މިނިސްޓްރީ އޮފް ހައުސިންގެ މެންޑޭޓަށް ބަދަލުތަކެއް ގެނެސް، ހައުސިންގ މިނިސްޓްރީ އާއި ޕްލޭނިންގ މިނިސްޓްރީގެ މެންޑޭޓަށް ފުށޫއެރުން ނައްތާލައިފި އެވެ.
ރައީސް އޮފީހުގެ ތަރުޖަމާން އިބްރާހިމް ހޫދު އާއި ހަވާލާދީ "ރާއްޖެއެމްވީ" އިން ރިޕޯޓްކުރާ ގޮތުގައި އާބަން ޑިވެލޮޕްމަންޓްގެ ހުރިހާ މަސައްކަތްތަކެއް ހައުސިންގ މިނިސްޓްރީގެ މެންޑޭޓުން ނަގާފައިވާ ކަމަށެވެ.
ކުރިން ހައުސިންގ މިނިސްޓްރީގައި އޮތް އާބަން ޑިވެލޮޕްމެންޓް މެންޑޭޓް މިހާރު ބަދަލުކޮށްފައި ވަނީ، މިނިސްޓްރީގެ އޮފް ނެޝަނަލް ޕްލޭނިން އެންޑް އިންފްރާސްޓަރަކްޗާ އަށެވެ. ނަމަވެސް މި ބަދަލު ގެނެސްފައިވާ ސަބަބެއް ހޫދު ހާމައެއް ނުކުރައްވައެވެ.
ދެމިނިސްޓްރީގެ މެންޑޭޓަށް މިހާރު މިގެނެވުނު ބަދަލާ ގުޅިގެން ހައުސިންގ މިނިސްޓްރީން ބަލަހައްޓާނީ ބޯހިޔާވަހިކަމާއި، ގެދޮރުވެރިކަމާއި ގުޅޭ މަސައްކަތްތަކެވެ. އެހެންކަމުން މި ބަދަލާއެކު ހައުސިންގ މިނިސްޓްރީ އާއި ޕްލޭނިންގ މިނިސްޓްރީގެ މެންޑޭޓްގައި ކުރިން ހުރި ފުށޫއެރުންތައް ހައްލުވެގެންދާނެ އެވެ.