މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަންގެ ފަރާތުން މިދިޔަ ޑިސެމްބަރ މަހުގެ 30 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި، ފަނޑިޔާރުން އައްޔަންކުރުމުގަ އާއި، ފަނޑިޔާރުންނާއި ގޭންގްތަކާ ގުޅުން އޮންނަ ކަމަށް ވިދާޅުވެ، އެ ކޮމިޝަންގެ ރައީސް އަލްއުސްތާޛު ހުސްނުއް ސުއޫދު ދައްކަވާފައިވާ ވާހަކަތަކުގެ ޙަޤީޤތައް ދެނެގަތުމަށް، ޖުޑިޝަލް ސަރވިސް ކޮމިޝަން (ޖޭއެސްސީ) އިން ކޮމިޓީއެއް އެކުލަވާލައި، އެކަމުގެ މަސައްކަތް ފަށައިފި އެވެ.
ޖޭއެސްސީ އިން މިއަދު ނެރުނު ބަޔާނެއްގައި ބުނެފައި ވަނީ ޖޭއެސްސީގެ ޤާނޫނުގެ 21 ވަނަ މާއްދާގެ (ހ)ގައި ބަޔާންކޮށްފައިވާ ގޮތުގެ މަތިން، އުއްތަމަ ފަނޑީޔާރާއި ސުޕްރީމް ކޯޓުގެ ފަނޑިޔާރުން ފިޔަވައި، އެހެން ފަނޑިޔާރުން އައްޔަންކުރުމާއި، ފަނޑިޔާރުންނާ ބެހޭގޮތުން އުފުލާ ޝަކުވާތައް ބެލުމާއި، އެފަރާތްތަކާ މެދު އަޅަންޖެހޭ ފިޔަވަޅުތައް އެޅުމާއި، މަޤާމުން ވަކިކުރަންޖެހޭ މީހުން ވަކިކުރުމަށް ހުށަހަޅަންޖެހޭ ފަރާތްތަކަށް ހުށަހެޅުމަކީ، ޤާނޫނީ ގޮތުން އެ ކޮމިޝަނާ ހަވާލުކޮށްފައިވާ މަސްއޫލިއްޔަތެއް ކަމަށެވެ.
އެހެންނަމަވެސް، އެ ކޮމިޝަނުން ފަނޑިޔާރުން އައްޔަންކުރުމުގެ މަސައްކަތް ކުރަމުންދާ ގޮތާއި އަދި ފަނޑިޔާރުންނާ ގުޅޭގޮތުން ނުރަނގަޅު ތަސައްވުރެއް އުފެދޭ ގޮތަށް، އެއިން އެއްވެސް މަޢުލޫމާތެއް އެ ކޮމިޝަނާއި ހިއްސާ ކުރުމެއް ނެތި، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުޤީޤުކުރާ ކޮމިޝަންގެ ފަރާތުން އެފަދަ ވާހަކަތަކެއް މީޑިއާ އަށް އާންމުކުރުމަކީ ޖޭއެސްސީ އިން ވަރަށް ކަންބޮޑުވާ ކަމެއް ކަމަށް އެ ބަޔާނުގައި ވެއެވެ.
އަދި ޝަރުޢީ ދާއިރާގެ ހުރުމަތާއި، ރައްކާތެރިކަމަށް ހުރަސް އެޅޭ، އަދި ފަނޑިޔާރުންނާ މެދު އާންމު ރައްޔިތުންގެ ހިތްތަކުގައި ނުރުހުމާއި، ނުތަނަވަސްކަން އުފެދޭ ފަދަ ވާހަކަތައް އެއްވެސް ފަރާތަކުން ނުދެއްކުމަށް ޖޭއެސްސީ އިން ވަނީ އިލްތިމާސްކޮށްފަ އެވެ.