ސްވިޒަލޭންޑްގެ ރިސާޗް ގްރޫޕެއްކަމަށްވާ އިންޓަނޭޝަނަލް ސެންޓަރ ފޯރ ސްޕޯޓްސް ސްޓަޑީސް (ސީއައިއެސް) އިން ދާދި ފަހުން ހެދި ސްޓަޑީއަކުން ދައްކާ ގޮތުން ދުނިޔޭގައި މި ވަގުތު ހުރި އެންމެ އަގުހުރި ކުޅުންތެރިޔަކީ ފްރާންސްގެ ޕީއެސްޖީ އަށް ކުޅޭ ކިލިއަން އެމްބާޕޭ އެވެ.
ސީއައިއެސްގެ ސްޓަޑީން ދައްކާގޮތުގައި ފްރާންސްގެ އުމުރުން 20 އަހަރުގެ އެމްބާޕޭގެ އަގަކީ 218.5 މިލިއަން ޔޫރޯއެވެ. 203.5 މިލިއަން ޔޫރޯގެ އަގަކާއެކު ދެވަނައިގައި އިންގްލެންޑްގެ ކެޕްޓަން ހެރީ ކޭން އޮތްއިރު ތިންވަނައިގައި އޮތީ އެމްބާޕޭއާއެކު ޕީއެސްޖީގައި ކުޅެމުން އަންނަ ބްރެޒިލްގެ ނޭމާ އެވެ. އޭނާގެ އަގެއްކަމަށް ސީއައިއެސް އިން އެސްޓިމޭޓްކޮށްފައިވަނީ 197.1 މިލިއަން ޔޫރޯއެވެ. މި ލިސްޓުގެ ގަދަ ފަހެއްގައި ދެން ހިމެނެނީ މެންޗެސްޓާ ސިޓީގެ ރަހީމް ސްޓާލިން އާއި ލިވަޕޫލަށް ކުޅޭ މިސްރުގެ ހުނަރުވެރި ކުޅުންތެރިޔާ މުހައްމަދު ސަލާހް އެވެ.
ދުނިޔޭގައި މިވަގުތުހުރި އެންމެ މޮޅު ކުޅުންތެރިޔާކަމަށް ގިނަ ބަޔަކު ގަބޫލުކުރާ ސްޕެއިނުގެ ބާސެލޯނާ އަށް ކުޅޭ އާޖެންޓީނާގެ ލިއޮނަލް މެސީ އަށް މި ލިސްޓުގެ ލިބިފައިވަނީ ހަތްވަނައެވެ. މެސީގެ އަގު 171.2 މިލިއަން ޔޫރޯ އަށް އަރާއިރު ޔުވެންޓަސް އަށް ކުޅެމުން އަންނަ ކްރިސްޓިއާނޯ ރޮނާލްޑޯ އަގަކީ 127.2 މިލިއަން ޔޫރޯއެވެ. އޭނާ އަށް މި ލިސްޓުން ލިބިފައިވަނީ 19 ވަނައެވެ.
މި ލިސްޓުގައި ހިމެނޭ ސްޕެއިނުގެ ކުޅުންތެރިންގެ ތެރެއިން އެންމެ ކުރީގައި އުޅެނީ 37 ވަނައިގައި އޮތް ސައުލް ނިގުއޭޒް އެވެ. އެތުލެޓިކޯ އަށް ކުޅެމުން އަންނަ ސައުލްގެ އަގެއްކަމަށް ކަނޑައަޅާފައިވަނީ 90 މިލިއަން ޔޫރޯ އެވެ.
ސީއައިއެސް އަކީ ފުޓްބޯޅައިގެ އެކި އެކި ތަފާސް ހިސާބުތަކުގެ މައްޗަށް ދިރާސާކުރުމުގައި އެންމެ ފުންނާބުއުސް ރިސާޗް ގްރޫޕެވެ. މި ރިސާޗް ގްރޫޕުގެ ފަރާތުން ފުޓްބޯޅަ ކުޅުންތެރިންނާއި ގުޅޭގޮތުން ކުރާ ދިރާސާތައް ބިނާވެގެން ވަނީ އެ ކުޅުންތެރިއަކު ދަނޑުމަތީގައި ދައްކާ ކުޅުމުގެ އިތުރުން ޓްރާންސްފާ ފީ އާއި ކުޅުންތެރިޔާގެ އެއްބަސްވުމާއި އަގަށް އަންނަ ބަދަލާއި ހުނަރުގެ މައްޗަށެވެ.