ލ.ގަމުން ހާލުބޮޑު ބަލި މީހަކު އެމްއެންޑީއެފް ހެލިކޮޕްޓަރުގައި މިރޭ މާލެ ގެނެސްދީފިއެވެ.
އެމްއެންޑީއެފް އިން މަޢުލޫމާތު ދޭ ގޮތުގައި މިރޭ 19:40 ހާއިރު މާލެ ގެނެސްދީފައިވަނީ އުމުރުން 86 އަހަރުގެ ފިރިހެނެކެވެ. ލ.ގަމު ރީޖަނަލް ހޮސްޕިޓަލުގައި ފަރުވާދެމުންދިޔަ މި މީހާ މާލެ ގެނެސްދީފައިވަނީ ޞިއްޙީ އިތުރު އަވަސް ފަރުވާއަށް މާލެ ގެންދިޔުމަށް ލ.ގަމު ރީޖަނަލް ހޮސްޕިޓަލުން މި މީހާ ބެއްލެވި ޑޮކްޓަރުން ލަފާ ދެއްވުމާ ގުޅިގެން ކަމަށްވެސް އެމްއެންޑީއެފް އިން ބުނެއެވެ.
މި ބަލިމީހާއާ އެކު އެމްއެންޑީއެފް ހެލިކޮޕްޓަރު ޖެއްސީ ވެލާނާ އިންޓަރނޭޝަނަލް އެއަރޕޯޓަށެވެ.
މި މީހާ މިހާރު ވަނީ އައިޖީއެމް ހޮސްޕިޓަލަށް ގެންގޮސްދީފައެވެ.
އެމްއެންޑީއެފް ހެލިކޮޕްޓަރުތަކުގައި ހާލުބޮޑު ބަލި މީހުންނަށް އެހީތެރިކަން ފޯރުކޮށްދޭން ފަށާފައިވާއިރު، އެ ހެލިކޮޕްޓަރުތައް އަނބުރާ ފޮނުވާލާނެ ވެރިޔަކީ އޭނާ ކަމަށް ކުރީގެ ހޯމް މިނިސްޓަރ އުމަރު ނަސީރު ވަނީ ވިދާޅުވެފަ އެވެ.