އެމެރިކާގެ ރައީސް ޑޮނަލްޑް ޓްރަމްޕްގެ ކެމްޕޭނު މައި ވައުދު ކަމަށްވާ މެކްސިކޯއާ އެމެރިކާ ބޯޑަރު ބޮޑު ފާރަކުން ވަކިކުރުމަށް ބޭނުންވާ ބަޖެޓު އަނެއްކާވެސް ދިނުމަށް ގާނޫނު ހަދާ މަޖިލީހަށް ޑިމާންޑުކޮށްފިއެވެ.
ފާރު ރޭނުމަށް ބޭނުންވާ 6 ބިލިއަން ޑޮލަރު ފާސް ކުރުމަށް އިދިކޮޅު ޑިމޮކްރެޓް ޕާޓީގެ އަޣުލަބިއްޔަތު އޮތް މަޖިލީހުން ވަނީ ދެކޮޅު ހަދާފައެވެ. އޭގެ ސަބަބުން ޓްރަމްޕް ވަނީ ސަރުކާރުގެ ބަޖެޓުގައި ސޮއިކުރުމަށް ދެކޮޅު ހަދާފައެވެ.
އެހެންކަމުން މިހާރު އެމެރިކާ ސަރުކާރު މުވައްޒަފުންގެ ލައްކައަކަށް ވުރެ ގިނަ މުވައްޒަފުން މަސައްކަތް ކުރަމުން ގެންދަނީ މުސާރައާ ނުލައެވެ. މުސާރައާ ނުލާ ކުރިއަށްދާ ވުޒާރާތަކުގެ ތެރޭގައި ސަރުކާރު، ހޯމްލޭންޑް ސެކިއުރިޓީ، ޓްރާންސްޕޯޓް އޮތޯރިޓީ ފަދަ މުހިންމު ވުޒާރާތައް ހިމެނެއެވެ.
އިދިކޮޅު ޕާޓީން ބުނެފައިވަނީ މިއީ އެމެރިކާ ސަރުކާރު ރައީސް ޓްރަމްޕް ހައިޖެކް ކުރުން ފަދަ އަމަލެއް ކަމަށް ސިފަކޮށްފައެވެ. އަދި މެކްސިކޯ އާ އެމެރިކާ ދެމެދު ފާރެއް ރޭނުމަކީ ކުރަން ޖެހޭ ކަމެއް ނޫން ކަމަށާއި ބޭކާރު ޚަރަދެއް ކުރަން ބަޖެޓު ފާސްނުކުރެވޭނެ ކަމަށް ބުނެފައެވެ.
އިއްޔެ ގައުމާއި ވާހަކަ ދައްކަވަމުން ރައީސް ޓްރަމްޕް ވިދާޅުވީ މެކްސިކޯ އާ އެމެރިކާއާ ދެމެދު ހެދުނު އާ ވިޔަފާރީގެ އެއްބަސްވުމެއްގެ ދަށުން މެކްސިކޯ އިން އެ ފާރަށް ނުސީދާ ގޮތުން ފައިސާ ދައްކާނެ ކަމަށެވެ.
މަޖިލީހުގެ ރައީސް ނޭންސީ ޕެލޮސީ ބުނެފައިވަނީ އެމެރިކާ ރައްޔިތުން "ރަހީނު" ކޮށްގެން ޓްރަމްޕަށް ނުހުރެވޭނެ ކަމަށާއި ސަރުކާރު ހުއްޓުވާފައި އޮތް ހުއްޓުވުމަށް ނިމުމަކަށް ގެނައުމަށް ގޮވާލާ ކަމަށެވެ. މައިނޯރިޓީ ލީޑަރ ޗަކް ޝޫމާ ވެސް ވަނީ ސަރުކާރު މުވައްޒަފުންގެ މުސާރަ ދިނުމަށް ޓްރަމްޕަށް ގޮވާލާފައެވެ.