އަލަށް އުފެއްދި މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީގެ އާންމު ޖަލްސާ ރޭ ބާއްވައި ޕާޓީގެ އަސާސީ ގަވާއިދާއި ކައުންސިލް ފާސްކޮށް، ހިންގުން ފަށައިފިއެވެ.
މަޝްހޫރު ގާނޫނީ ވަކީލް އަބްދުﷲ ހަސީން އިސްކޮށް ހުންނަވައިގެން އުފެއްދި މިޕާޓީގެ އާންމު ޖަލްސާގައި ރޭ 317 މެމްބަރުން ބައިވެރިވިއެވެ. ޖަލްސާގައި ޕާޓީގެ ލީޑާޝިޕަށް ބޭފުޅުން އައްޔަން ކުރުމާއި ލޯގޯ އަދި ކުލަ ވަނީ ފާސްކޮށްފައެވެ.
ލީޑަޝިޕަށް ހަސީންގެ ވެސް އިންތިޚާބުވެފައިވާއިރު އޭނައާއެކު ޕާޓީ އުފެއްދުމުގައި އިސްކޮށް ހަރަކާތްތެރިވި 14 ބޭފުޅަކު ވަނީ ލީޑަޝިޕަށް އައްޔަން ކުރެވިފައެވެ.
ޕާޓީގެ ކުލައެއްގެ ގޮތުގައި ފާސްކޮށްފައިވަނީ ރަތާއި ކަޅާއި ހުދު ކުލައެވެ. ލޯގޯއަކަށް ހުރީ ބިންގަލެއްގެ މަތީގައި ގާއިމުކުރެވިފައި އިން ފަސް ތަނބެވެ.
ޕާޓީގެ އާންމު ޖަލްސާގައި ވާހަކަ ދައްކަވަމުން ހަސީން ވިދާޅުވީ ޕާޓީގެ އަމާޒަކީ މަސައްކަތްތެރިންގެ ހައްގު ލިބެންވާ މިންވަރަށް ހޯދާދިނުން ކަމަށެވެ. އެހެން ޕާޓީތަކުން ކުރިއަރުވަނީ ވެރިންނާއި ވިޔަފާރިވެރިންގެ ވިސްނުން ކަމަށާއި ރާއްޖެ ކުރިއަރައި ދިއުމަށް އެފިކުރު ބަދަލު ކުރަން ޖެހޭ ކަމަށް ވިދާޅުވިއެވެ.
މި ޖަލްސާ ޝަރަފުވެރިކޮށް ދެއްވުމަށް އިޖުތިމާއީ ގޮތުން ގިނަ ގުނަ ޚިދުމަތްތަކެއް ކޮށްދެއްވާފައިވާ މުޙައްމަދު ޝިހާބުގެ އިތުރުން ދިއްދޫ ދާއިރާގެ މެމްބަރު އަބްދުއްލަތީފް ބައިވެރިވެވަޑައިގެންނެވިއެވެ. ލަތީފް ވަނީ އަދީބުގެ އެމްޓީޑީ ގެ އާންމު ޖަލްސާގައި ވެސް ބައިވެރިވެވަޑައިގެންފައެވެ. އަދި އެޖަލްސާގައި އަދީބުގެ ދިފާއުގައި ވާހަކަވެސް ދެއްކެވިއެވެ.