ސައުދީ އަރަބިއްޔާ އަށް ނިސްބަތްވާ 18 އަހަރުގެ ރަހަފް އަލް ޤަނޫން އާއިލާއަށް ފިލައިގެން ގައުމުން ބޭރުވެފައިވަނިކޮށް ކެނެޑާއިން އޭނާއަށް ހިމާޔަތް ދީފިއެވެ.
އޮސްޓްރޭލިޔާއަށް ބަދަލުވުމަށް ނިންމައި ރަހަފް އާއިލާ ދޫކޮށް ކުވެއިތުން ތައިލެންޑަށް ގޮސްފައިވަނިކޮށް ތައިލެންޑު އެއާޕޯޓުން ވަނީ އާއިލާއިން އެދިގެން ރަހަފް އަނބުރާ ކުވެއިތަށް ޑީޕޯޓުކުރަން މަސައްކަތް ކޮށްފައެވެ.
ނަމަވެސް ސޯޝަލް މީޑިޔާގައި އޭނާގެ ވާހަކަ ހިއްސާ ކުރުމުން އެތައް ބަޔަކު ވަނީ ރަހަފްގެ ދިފާއުގައި އަޑުއުފުލައި، ކަމާ ބެހޭ ފަރާތްތަކުގެ ސަމާލު ކަމަށް އެކަން ގެނެސްފައެވެ. އޭނާ ބުނެފައިވަނީ އެނބުރި ކުވެއިތަށް ގޮސްފިނަމަ އާއިލާއިން އޭނާ މަރާލާނެ ކަމަށެވެ. އަދި އެއާޕޯޓުގައި އޭނާގެ ބޭބެއިން ބަލާ ގޮސް ތިބޭނެ ކަމަށާއި އެމީހުންގެ ފަރާތުން ސަލާމަތެއް ނުވެވޭނެ ކަމަށް ބުނެ ޓުވީޓުކޮށްފައެވެ.
އޭގެ ސަބަބުން ތައިލެންޑުގައި ހަރަކާތްތެރިވާ އދ. ގެ ރެފިއުޖީ ސެންޓަރުން ވަނީ އދ. ގެ ހިމާޔަތަށް އޭނާ ގެނެސްފައެވެ. އަދި އޭނާއަށް ކެނެޑާގެ ބޮޑުވަޒީރު، ޖަސްޓިން ޓްރޫޑޯ ރަސްމީކޮށް އެގައުމުން ހިމާޔަތް ދިނުމުން، ދެކުނު ކޮރެއާ މަގުން ކެނެޑާއަށް ދިއުމަށް މިހާރު ވަނީ ފުރާފައެވެ.
ޓްރޫޑޯ ވަނީ ކެނެޑާއިން އަބަދުވެސް އިންސާނީ ހައްގުތަކާއި އަންހެނުންގެ ހައްގުތައް ކަށަވަރުކުރާނެ ކަމަށް ވިދާޅުވެ ރަހަފްގެ ދިފާއުގައި ވާހަކަ ދައްކާފައެވެ.