އިންޑިޔާ ފާދިރީ، ރާމް ރަހިމް ސިންހްގެ މައްޗަށް 2002 ވަނަ އަހަރު ނޫސްވެރިޔަކު މަރާލިކަމުގެ ކުށް ސާބިތުވެ ހުކުމް ކުރުމާ ހަމައަށް ގޮސްފިއެވެ.
ގުރުމީޓް ރާމް ރަހިމް ސިންހް، ޑީރާ ސަޗާ ސައުޑާ ސެކްޓުގެ ލީޑަރު ނޫސްވެރިޔަކު މެރިކަމުގެ ކުށް ސާބިތުވެފައިވާއިރު އޭނާގެ މައްޗަށް ދެ އަންހެނުން ރޭޕް ކުރިކަމުގެ ކުށް ސާބިތުވެ ޖަލު ހުކުމެއް މިހާރުވެސް ދަނީ ތަންފީޒު ކުރަމުންނެވެ.
ވިހި އަހަރުގެ ޖަލު ހުކުމެއް އޭނާގެ މައްޗަށް އިއްވާފައިވަނީ 2017 ވަނަ އަހަރުގައެވެ. އެ ހުކުމާ ގުޅިގެން އޭނާގެ ސަޕޯޓަރުން ވަނީ އިންޑިޔާގައި ބޮޑެތި ހަމަނުޖެހުންތަކެއް އުފައްދައި، އޭގެ ސަބަބުން 38 މީހުން މަރުވެފައިވެއެވެ.
އޮކްޓޯބަރު، 2002 ގައި ޕޫރާ ސާޗް ނޫހުގެ އެޑިޓަރު ޗަޕްރަޓަރީ މަރާލީ އެނޫހުގައި ލިޔުނު ލިޔުމަކަށް ފަހު އިންޒާރުތަކެއް ލިބިފައިވަނިކޮށެވެ. އޭނާ ވަނީ ރާމް ރަހިމް ސިންހްއާއި އޭނާގެ ޑީރާ ހެޑްކުއާޓާސްގައި ހިންގާ ލާއިންސާނީ އަމަލުތަކުގެ ވާހަކަ ލިޔެފައެވެ.
އޭގެ ސަބަބުން ޗަޕްރަޓަރީއަށް ދިޔައީ މަރުގެ އިންޒާރުތައް ލިބެމުންނެވެ. ނަމަވެސް އޭނާ އެ އިންޒާރުތަކަށް ބެލުމެއް ނެތި ނޫސް ހިންގަމުންދިޔަތާ ފަސް ވަނައަށް ވީ ދުވަހު ބަޔަކު ވަނީ ބަޑި ޖަހައި އޭނާ މަރާލާފައެވެ. ތިން މީހަކު އެ މައްސަލާގަިއ ހައްޔަރުކުރި ނަމަވެސް މަރު ވަނީ ރާމް ރަހިމް ސިންހްގެ ކުށެއް ކަމަށް ސާބިތުވެފައެވެ.