ފެށިގެންދާ ދިރާސީ އާ އަހަރާއެކު ސަރުކާރުގެ ސިޔާސަތުތައް ތަޢުލީމީ ދާއިރާގައި ވެސް ގާއިމުވެގެން ދާނެ ކަމަށާއި ދިވެހި ރާއްޖޭގެ ތައުލީމީ ނިޒާމުވެސް ލާމަރުކަޒީ ވެގެންދާނެ ކަމަށް އެޑިއުކޭޝަން މިނިސްޓަރ އާއިޝަތު އަލީ ވިދާޅުވެއްޖެއެވެ.
ދިރާސީ އާ އަހަރު ފެށުމާ ގުޅޭގޮތުން މިނިސްޓަރު ދެއްވި ޚިތޯބުގައި ވިދާޅުވީ ތައުލީމީ ނިޒާމު ލާމަރުކަޒީ ކުރުމަށް ބޮޑެތި މީހުންގެ ނުރަސްމީ ތަޢުލީމު ޚާއްސަ ކައުންސިލްތަކަކަށް ބަދަލުކުރެވިގެންދާނެ ކަމަށެވެ.
މީގެ އިތުރުން ކިޔަވައިދޭއިރު ހުރިހާ ކުދިން ބައިވެރިކުރުވާ، ތަފާތުކުރުމެއް ނެތް "އިންކްލޫސިވް" ތައުލީމު ދިނުމަށް ސަރުކާރުން ޚާއްސަ ސަމާލުކަމެއް ދޭނެ ކަމަށް މިނިސްޓަރ ވިދާޅުވިއެވެ. "ދަރިވަރުންގެ ތަފާތުތައް ދެނެގަނެ، ކޮންމެ ކުއްޖަކަށް ބޭނުންވާ އަޅާލުންތެރިކަން ދީގެން، ހުރިހާ ކުދިން ހިމެނޭގޮތުން ދެވޭ ތަޢުލީމަށް މިހާރަކަށް އައިސް ކިޔަނީ އިންކްލޫސިވް އެޑިޔުކޭޝަން. މި ނިޒާމް މިހާރަށް ވުރެ ފުރިހަމަ ކުރުމަށްޓަކައި ވަކި ޑިވިޜަނެއް މި ވުޒާރާގައި އުފައްދައި ސަފުން އިތުރު ސަމާލުކަމެއް، މި ނިޒާމް ފުރިހަމަ ކުރުމަށް ދޭނެ ވާހަކަ ދަންނަވާލަން"
ދިވެހި ރާއްޖޭގައި އަލަށް ފެށުނު ހިލޭ ކިޔަވާކުދިންނަށް ނާސްތާ ޕްރޮގްރާމާ ގުޅޭގޮތުން މިނިސްޓަރު ވިދާޅުވީ ޕައިލަޓް ޕްރޮގްރާމް 25 ސްކޫލެއްގައި މިއަދު ފެށިގެން ގޮސްފައިވާއިރު ދެވަނަ ޓާމުން ފެށިގެން ރާއްޖޭގެ ހުރިހާ ސްކޫލެއްގައި މި ޕްރޮގްރާމް ކުރިއަށް ދާނެ ކަމަށެވެ.
ފުރަތަމަ ޓާމުގައި މިނިސްޓްރީން ހޮވި 25 ސްކޫލެއްގައި މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވާއިރު އެ ސްކޫލްތަކުން ޕްރޮގްރާމަށް ގެންނަން ޖެހޭ ބަދަލުތައް މިނިސްޓްރީން ބަލަމުގެންދާނެއެވެ.