މާލޭގެ ގެތަކަށް ވަނުމަށް ގޭގެ މީހުން ދޮރާށި މަތީ ބާއްވާ ޕެލެޓުތައް ސިޓީ ކައުންސިލުން ނަގައި، ކޮންމެ ދޮރާއްޓެއްގައި ދުވާރެއް ރޭނުމަށް ކައުންސިލުން ނިންމައިފިއެވެ.
މާލެ ކައުންސިލް މެމްބަރު ހުސެއިން ޝަރީފާ ހަވާލާދީ "މިހާރު" އިން ރިޕޯޓުކޮށްފައިވާ ގޮތުގައި، ހިނގާ މީހުންނަށް ޕެލެޓުތަކުގެ ސަބަބުން ދަތިވެ އަނިޔާވާން ފެށުމުން ޕެލެޓުތައް ނެގުމަށް ކައުންސިލުން ނިންމައި، ގެތަކަށް ވަނުމަށް ދުވާރު ރާނަން ވަނީ ނިންމާފައެވެ.
ޕެލެޓުތައް ނެގި ނަމަވެސް އަނެއްކާވެސް ގޭގެއަށް ވަނުމަށް ދަތިވެ މީހުން ޕެލެޓުތައް ބަހައްޓާތީ ދާއިމީ ހައްލެއް ހޯދުމަށް ދުވާރު ރޭނުމަށް ކައުންސިލުން ވަނީ ރޭގެ ބައްދަލުވުމުގައި ނިންމާފައެވެ.
އަދި ނުކުޅުންތެރިކަން ހުންނަ މީހުންނާއި ގަރާޖު ކުރިމަތީ އުސްކޮށް ރޭމްޕު ހަދާ ދިނުމަށް ވެސް ކައުންސިލުން ވަނީ ނިންމާފައެވެ. އަދި އެ މަސައްކަތް މިހަފްތާ ތެރޭ ފެށުމަށް ކައުންސިލުން އަންނަނީ ތައްޔާރުވަމުންނެވެ.