މެންޗެސްޓާ ޔުނައިޓެޑުގެ ކެޕްޓަން އެންޓޯނިއޯ ވެލެންސިއާ މިސީޒަން ނިމުމުން ކުލަބު ދޫކޮށްލުމަށް ނިންމާފައިވާ ކަމުގެ އަޑު ފެތުރިއްޖެއެވެ.
މެންޗެސްޓާ ޔުނައިޓެޑާއި ސާ އެލެކްސް ފާގަސަންގެ ދުވަސްވަރު ގުޅުނު މަދު ކުޅުންތެރިންގެ ތެރޭގައި ހިމެނޭ ވެލެންސިއާގެ ކޮންޓްރެކްޓް މި ސީޒަން ނިމުމުން ހަމަވާނެއެވެ. އޭނާގެ އެޖެންޓު ވަނީ ކުލަބާއެކު އިތުރު އެއްބަސްވުމެއް ނަހަދާ އެހެން ކުލަބަކަށް ބަދަލުވުމަށް ނަސޭހަތްތެރިވެފައި ކަމަށް މީޑިޔާ ރިޕޯޓުތައް ބުނެއެވެ.
އުމުރުން 33 އަހަރު ވެފައިވާ ވެލެންސިއާ ޔުނައިޓެޑާއި ގުޅުނީ 2009 ވަނަ އަހަރުގައެވެ. އެލެކްސް ފާގަސަންގެ ކޯޗު ކަމުގައި އަރިމަތީ ފަޅިން ކުޅުނު ވެލެންސިއާ ފާގަސަންއަށް ފަހުން އައި ކޯޗުންގެ އިރުޝާދުން ފުލްބެކަކަށް ވަނީ ބަދަލުވެފައެވެ.
ޑިފެންޑަރެއްގެ ރޯލުގައި ގިނަ މެޗުތައް ވެލެންސިއާ ކުޅެފައިވާއިރު މިދިޔަ ސީޒަނުގެ ގިނަ މެޗުގައި އޭނާ ވަނީ ޔުނައިޓެޑުގެ ކެޕްޓަންގެ ރޯލު އަދާކޮށްފައެވެ. މައިކަލް ކެރިކް ރިޓަޔާ ކުރުމުން މޮރީނިއޯ ވަނީ މިސީޒަން ފެށުމުން ކުލަބުގެ ކެޕްޓަނަކަށް ވެލެންސިއާ އައްޔަން ކޮށްފައެވެ.