ރާއްޖެއަށް އާމްދަނީގެ ގޮތުގައި މިދިޔަ މަހު 1.4 ބިލިއަން ރުފިޔާ ލިބިފައިވާ ކަމަށް ދައުލަތުގެ ޓެކްސް އިދާރާ ކަމަށްވާ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ބުނެފިއެވެ.
މިއީ މީރާއިން މިދިޔަ މަހު ލިބޭނެ ކަމަށް ލަފާކުރި އަދަދަށް ވުރެ އެއް ޕަސެންޓް ދަށް އަދަދެކެވެ. އަދި މިއީ 2017 ވަނަ އަހަރާއި އަޅާބަލާއިރު، 4.5 ޕަސެންޓް އިތުރު އަދަދެކެވެ.
މީރާއިން އާންމުކުރި ތަފާސްހިސާބުތަކުން ދައްކާ ގޮތުގައި މިދިޔަ މަހު މީރާއަށް ލިބިފައިވާ 1.4 ބިލިއަން ރުފިޔާގެ ތެރެއިން ޑޮލަރުން ބަލައިގެންފައި ވަނީ 65 މިލިއަން ޑޮލަރެވެ. އެއީ އެއް ބިލިއަން ރުފިޔާއެވެ.
މިދިޔަ މަހުގެ އާމްދަނީގެ އެންމެ ބޮޑު ޕަސެންޓަކީ މުދަލާއި ޚިދުމަތުގެ އަގުން ނަގާ ޓެކްސް ނުވަތަ ޖީއެސްޓީ އެވެ. އެގޮތުން މިދިޔަ މަހު ޖީއެސްތީގެ ގޮތުގައި 630 މިލިއަން ރުފިޔާ ލިބިފައިވެއެވެ. އެއީ އާމްދަނީގެ 43 ޕަސެންޓެވެ.
ދެވަނަ އަށް އެންމެ ބޮޑު އާމްދަނީއެއް ލިބުނީ ޓޫރިޒަމް ލޭންޑް ރެންޓް އިންނެވެ. އެގޮތުން ޓޫރިޒަމް ލޭންޑް ރެންޓްގެ ގޮތުގައި 352 މިލިއަން ރުފިޔާ ލިބިފައިވެއެވެ.
މިދިޔަ މަހުގެ އާމްދަނީ ދަށްވެފައި ވަނީ ޓޫރިޒަމް ލޭންޑް ރެންޓް ދައްކަންޖެހޭ ބައެއް ފަރާތްތަކުން އެ ފައިސާ ނުދެއްކުމުން ކަމަށް މީރާ އިން ބުނެއެވެ.