އިސްރަށްވެހިންނަށް ޚާއްސަކޮށްގެން، ފުލުހުންގެ ނެއިބަރހުޑް ސަޕޯޓު އޮފިސަރުން ފޯރަމެއް ބާއްވައިފި އެވެ.
މިއަދު އިސްކަންދަރު ބިލްޑިންގގައި އިސްރަށްވެހިންނާއި އެކު މިއަދު ބޭއްވި މި ފޯރަމް ފައްޓަވައިދެއްވީ އެކްޓިންގ ކޮމިޝަނަރ އޮފް ޕޮލިސް މުޙައްމަދު ޙަމީދު އެވެ.
ފުލުހުން މަޢުލޫމާތު ދޭ ގޮތުގައި މިއަދު ބޭއްވި އެ ފޯރަމްގައި، އިސްރަށްވެހިންގެ ޚިޔާލާއި ތަޖުރިބާ އަދި ފުލުހުންގެ މަސައްކަތްތަކާއިމެދު އިސްރަށްވެހިންގެ އުންމީދުތައް އަޑުއަހައި މަޝްވަރާ ހޯދާފައިވާ ކަމަށެވެ.
މީގެ އިތުރުން، މިއަދުގެ ފޯރަމްގައި ރައްޔިތުންގެ އިތުބާރާއި ޔަޤީންކަން ހޯދުމާއި، ނަފްސާއި މުދަލާއި ގެދޮރުގެ ރައްކާތެރިކަން ހޯދުމާއި، މަގުމަތީގެ ސަލާމަތާއި ރައްކާތެރިކަމުގެ އިތުރުން ކުށް މަދުކުރުމަށް ކުރެވޭ މަސައްކަތްތަކާއި އަދި ފުލުހުންނާ މުޖްތަމަޢުއާއި އޮންނަ ގުޅުން ބަދަހި ކުރުމަށް މަސައްކަތްކުރެވިދާނެ ގޮތްތަކާއި ގުޅޭގޮތުން ވެސް އިސްރަށްވެހިންގެ ޚިޔާލު ހޯދާފައިވެއެވެ.
ސަރުކާރުގެ 100 ދުވަހުގެ ވަޢުދުތަކުގެ ތެރޭގައި ހިމެނޭ ފުލުހުންނާ ގުޅުންހުރި ވަޢުދުތަކުގެ ތެރެއިން، ފުލުހުންގެ ހިންގުން ހަރުދަނާ ކުރުމަށް ރައްޔިތުންގެ ޚިޔާލު ހޯދުމަށް ބޭއްވި މިފޯރަމްގައި، އެކްޓިންގ ކޮމިޝަނަރ އޮފް ޕޮލިސް މުޙައްމަދު ޙަމީދާއި، ފުލުހުންގެ ސީނިއަރ އޮފިސަރުންނާއި، މާލެ ހިމެނޭ ސަރަޙައްދުގެ 8 ނެއިބަރހުޑުން 35 މެންބަރުން ބައިވެރިވެފައިވެއެވެ.