އިނގިރޭސި ކްލަބް ޗެލްސީ ދޫކޮށް ދާދިފަހުން ފްރާންސްގެ މޮނާކޯ އަށް ބަދަލުވި ސްޕެއިންގެ މިޑްފީލްޑަރު ސެސް ފެބްރިގާސް އެ ޓީމުގެ ޖާޒީގައި މާސޭ އާ ދެކޮޅަށް ފްރެންޗް ލީގުގައި ކުޅުނު މެޗުން އެއްވަރުވެއްޖެއެވެ.
ރޭގެ ނަތީޖާއާއެކު މޮނާކޯ އަދިވެސް އުޅެނީ 14 ޕޮއިންޓާއެކު ލީގުގެ ފުލުން ދެވަނައިގައެވެ. މި މެޗުން އެއްވަރުވުމުން މާސޭ ވަނީ 28 ޕޮއިންޓާއެކު ތާވަލްގެ 9 ވަނަ އަށް ވެއްޓިފައެވެ.
މާސޭގެ ދަނޑުގައި ރޭ ކުޅުނު މި މެޗުގައި ކުރީން ލީޑްނެގީވެސް އެ ޓީމުންނެވެ. 13 ވަނަ މިނެޓުގައި މިލަނޑު އެ ޓީމަށް ޖަހައިދިނީ މެކްސިމޭ ލޮޕޭޒް އެވެ. މިއީ މޮނާކޯގެ ޑިފެންޑަރު ކަމިލް ގްލިކް އަށް ހެދުނު ގޯހެއްގެ ފައިދާނަގައި ލޮޕޭޒް ކާމިޔާބުކުރި ގޯލެކެވެ.
ފުރަތަމަ ހާފު ނިމެން ހަތް މިނެޓަށްވެފައިވަނިކޮށް މޮނާކޯ އަށް އެއްވަރުކޮށްދިނީ ބެލްޖިއަމްގެ ޔޫރީ ޓީލެމެންސް އެވެ. މެޗުގެ ފުރަތަމަ ހާފު ނިމުނީ ދެ ޓީމު 1-1 އިން އެއްވަރުވެގެންނެވެ.
ދެވަނަ ހާފުގައި މާސޭގެ ފްލޮރިއަން ތޯވާން ގޯލެއް ކާމިޔާބުކޮށްދިން ނަމަވެސް ވީއޭއާރްގެ އެހީ ހޯދުމަށްފަހު އެއީ ގޯލެއްނޫންކަމަށް ވަނީ ނިންމާފައެވެ. އެއީ މެޗުގެ ވީޑިއޯ ފުޓޭޖް ބެލިއިރު އެ ބޯޅަ ފޮނުވާލުމުގެކުރީން މޮނާކޯގެ ގޯލްކީޕަރު ޑިއެގޯ ބެނާލިއޯ އަށް ފައުލްކުރުމުންނެވެ.
މި މެޗުގެ ފަހު ވަގުތުގައި ފެބްރިގާސް ވަނީ މޮނާކޯ އަށް ތިން ޕޮއިންޓް ކަށަވަރުކުރުމަށް ލަނޑުޖަހާނެ ރަނގަޅު ފުރުޞަތެއް ތަނަވަސްކޮށްފައެވެ. ނަމަވެސް، ފަބްރެގާސް ދިން ބޯޅަ އެ ޓީމުގެ ޓީލެމެންސް ފޮނުވާލުމުން ދިޔައީ ގޯލްގެ ކަނާތް ފަރާތު ދަނޑިކައިރިން ބޭރަށެވެ.
މި މުބާރާތުގައި މި ހަފްތާގައި ކުޅުނު މެޗުތަކަށްފަހު، ތާވަލްގެ އެންމެ ކުރީގައި އަދިވެސް އުޅެނީ އެންމެ ފަހުގެ ޗެމްޕިއަން ޕީއެސްޖީ އެވެ. ލީގުގައި ހޮނިހިރު ދުވަހު އަމިއެންސް އަތުން 3-0 އިން މޮޅުވެ އެ ޓީމު ވަނީ ބަލިނުވެ ވިދިވިދިގެން 18 މެޗު ހަމަކޮށް 13 ޕޮއިންޓްގެ ލީޑެއްނަގައިފައެވެ.
ލީގުގައި މޮނާކޯ ދެން ކުޅޭ މެޗުގައި އަންނަ ބުދަ ދުވަހުގެ ރޭ އަމިއްލަ ދަނޑުގައި ނިކުންނާނީ ތާވަލްގެ 8 ވަނައިގައި އޮތް ނީސް އާ ދެކޮޅަށެވެ.