ކުރިއަށް އޮތް މަޖިލިސް އިންތިޚާބުގައި ޖޭޕީން ވާދަކުރަނީ ކިތައް ގޮނޑިއަށްތޯއާއި ދާއިރާތައް ކަނޑައެޅުމަށް އެޕާޓީން ހަތް މެމްބަރުންގެ ޚާއްސަ ކޮމިޓީއެއް އުފައްދައިފިއެވެ.
މިކޮމިޓީގައި ރިޔާސަތު ބަލަހައްޓާނީ ޖޭޕީގެ ރައީސް އަދި ޓޫރިޒަމް މިނިސްޓަރ އަލީ ވަހީދެވެ. ނައިބަކަށް ކަނޑައަޅާފައިވަނީ ޖޭޕީގެ ކައުންސިލް މެމްބަރު އަހުމަދު އުމަރެވެ.
ރޭ ޖޭޕީގެ 126 ވަނަ ކައުންސިލް ބައްދަލުވުމުގައި މަޖިލިސް އިންތިޚާބާ ގުޅޭގޮތުން ކުރިއަށް ގެންދިއުމަށް ޚާއްސަ ކޮމީޓީއެއް އުފައްދާފައިވާއިރު ޖޭޕީން އަދިވެސް ވާދަކުރާ ދާއިރާތައް ކަނޑައެއް ނާޅައެވެ. ނަމަވެސް ވާދަކުރަން އެދޭ ފަރާތްތަކަށް ފޯމު ހުށައެޅުމުގެ ފުރުސަތު ޖޭޕީން ވަނީ ހުޅުވާލާފައެވެ.
ސަރުކާރު ހިންގާ ކޯލިޝަނުގައި ހިމެނޭ އެމްޑީޕީން 86 ދާއިރާއަކަށް ވާދަކުރުމަށް ނިންމައި ޕްރައިމަރީތަކަށް މިމަހުގެ 18 ވަނަ ދުވަހު ބޭއްވުމަށް އަންނަނީ ތައްޔާރުވަމުންނެވެ. އަދާލަތު ޕާޓީން ވަނީ 13 ދާއިރާއަކަށް ވާދަކުރަން ނިންމައި ކެންޑިޑޭޓުން ފޯމު ހުށައަޅަން ފުރުސަތު ހުޅުވާލާފައެވެ.