މިހާރު ކުރިއަށްދާ 29 ވަނަ ގައުމީ ކެރަމް މުބާރާތުގެ ޑަބަލްސްގެ ތިން އިވެންޓްގެ ޗެމްޕިއަންކަން ކަށަވަރުވެއްޖެއެވެ.
މި ޖަނަވަރީ މަހުގެ 10 އިން 17 އަށް ގަލޮޅު ދަނޑުގައި ހުންނަ ކެރަމް ހޯލުގައި ކުރިއަށްދާ ގައުމީ ކެރަމް މުބާރާތުގެ މިކްސް ޑަބަލްސްގެ ޗެމްޕިއަންކަން އިބްރާހިމް ހުޖާން އަދި އައިޝަތު ނަހުފާ ހޯދިއިރު އަންހެން ޑަބަލްސް އިވެންޓުގެ ޗެމްޕިއަންކަން ހޯދައިފައިވަނީ އައިމިނަތު ޝުބާ އާއި ފާތުމަތު ރަޔާންއެވެ. މި މުބާރާތުގެ ފިރިހެން ޑަބަލްސް އިވެންޓްގެ ޗެމްޕިއަންކަން ހޯދީ މުޙައްމަދު އާމިރު (އާންބެ) އާއި އާދަމް އަދީލްއެވެ.
މިކްސް ޑަބަލްސްގެ ފައިނަލްގައި ފޯރިގަދަ ކުޅުމަކަށްފަހު އިސްމާއިލް އަޒްމީން އާއި އައިމިނަތު ޝުބާގެ ޕެއާ ބަލިކުރުމަށްފަހު އިބްރާހިމް ހުޖާން އަދި އައިޝަތު ނަހުފާ މި ހޯދި ކާމިޔާބީ އަކީ، ފަހުގެ ތާރީޙެއްގައި ގައުމީ މިކްސް ޑަބަލް ޗެމްޕިއަންކަން ނެގި އުމުރުން އެންމެ ހަގު ޕެއަރއެވެ. މީގެކުރީން، 2017 ވަނަ އަހަރު އިންޑިއާގައި ކުރިއަށްދިޔަ ޖޫނިއަރ ޓެސްޓް ސީރީޒްގައިވެސް މިދެކުޅުންތެރިން ވަނީ ރަނގަޅު ކުޅުމެއް ދައްކާފައެވެ. މިކްސް ޑަބަލްސް އިވެންޓުގެ ތިން ވަނަ ހޯދާފައިވަނީ ފާތުމަތު ރަޔާން އާއި އާދަމް އަދީލް ބަލިކޮށް އައިމިނަތު ވިޝާމާ އާއި ހުސައިން ނީޝާމްއެވެ.
އަންހެން ޑަބަލްސް އިވެންޓުގައި އައިމިނަތު ވިޝާމާ އާއި އައިމިނަތު ވިދާދު ސީދާ ދެ ސެޓުން ބަލިކޮށް ޗެމްޕިއަންކަން ހޯދާފައިވަނީ ތަށި ދިފާއުކުރަން ނިކުތް އައިމިނަތު ޝުބާ އާއި ފާތުމަތު ރަޔާންއެވެ. މިއީ މި ދެކުޅުންތެރިންގެ ޕެއަރ ގައުމީ ޑަބަލްސް ޗެމްޕިއަންކަން ނެގި 3 ވަނަ ފަހަރެވެ.
ފިރިހެން ޑަބަލްސް އިވެންޓުގެ ފޯރިގަދަ ފައިނަލުގައި ކުރީގެ ޗެމްޕިއަނުން ކަމަށްވާ އަލީ އާޒިމް އާއި ހުސައިން އަލީ ބަލިކުރުމަށްފަހު ޗެމްޕިއަންކަން ހޯދީ މުޙައްމަދު އާމިރު (އާންބެ) އާއި އާދަމް އަދީލްއެވެ.
މި މުބާރާތުގައި ސިންގަލްސް އިވެންޓުގެ ނޮކްއައުޓް މެޗުތައް ނިމި، އަންހެން އިވެންޓުގެ ފައިނަލަށް ދަތުރުކޮށްފައި ވަނީ އައިމިނަތު ވިދާދު އާއި އައިމިނަތު ޝުބާ އެވެ. ތިން ވަނަ ހޯދާފައިވަނީ ފާތިމަތު ރަޔާން ބަލިކޮށް އައިމިނަތު ވިޝާމާ އެވެ. ފިރިހެން އިވެންޓުގެ ފައިނަލަށް ދަތުރުކޮށްފައިވަނީ އާދަމް އަދީލް އާއި އިސްމާއިލް އަޒްމީން އެވެ. ތިންވަނަ ހޮވާ މެޗުގައި ވާދަކުރާނީ ހުސައިން އަލީ އާއި ޔަމާން އަބްދުލް ޖަލީލެވެ.
ޓީމު އިވެންޓުގެ މެޗުތައް މިރޭ ފެށުމަށް ހަމަޖެހިފައިވާއިރު، ފައިނަލް މެޗުތައް ކުރިއަށްދާނީ މި މަހުގެ 16 އަދި 17 ވަނަ ދުވަހުއެވެ.