މިދިޔަ އަހަރުގެ އޮކްޓޯބަރު މަހު އިންޑޮނީޝިޔާގެ ޖަކާޓާއިން ނައްޓާލި ލަޔަން އެއާގެ ޖޭޓީ610 ބޯޓުގެ ކަޅުފޮށި އިންޑޮނީޝިޔާ ޑައިވަރުން ހޯދައިފިއެވެ.
ޖަކާޓާ އިން ޕަންކަލް ޕިނަންގ އަށް ދަތުރުކުރި ބޯޓު ޖަކާޓާ އެއާޕޯޓުން ނައްޓާލިތާ މާގިނައިރުތަކެއް ނުވެ ޕައިލަޓް ވަނީ އަނބުރާ ޖެއްސުމުގެ ހުއްދައަކަށް އެދިފައެވެ. އެއާޕޯޓް ކޮންޓްރޯލުން ބުނީ ޕައިލެޓް އެހެން ބުނި ފަހުން ބޯޓާ އެއްވެސް ވަރަކަށް މުއާމަލާތް ނުކުރެވި ބޯޓުގެ އަޑު ކެނޑުނު ކަމަށެވެ.
އިންވެސްޓިގޭޓަރުން ބުނީ ބޯޓު ވެއްޓުމުގެ ކުރިން ޓެކްނިކަލް މައްސަލަތަކާ ދިމާވި ކަމަށެވެ. ބޯޓު ވެއްޓި ދަތުރުކުރި 189 މީހުން ވެސް ވަނީ އެ ހާދިސާގައި މަރުވެފައެވެ. ބޯޓުގެ ބޮޑުބައި ކަނޑަށް ޣަރަގުވެފައިވާއިރު ފެނިފައިވަނީ ކުދި ކުދި ބައިތަކެވެ.
އިންޑޮނީޝިޔާ އޮފިޝަލުން ރޮއެޓާސް އަށް ބުނެފައިވަނީ ކަޅުފޮށި ފެނިފައިވަނީ 8 މީޓަރު އަޑިން މަޑުތަކެއްގެ ތެރޭގައި ފޮރުވިަފއި ވަނިކޮށް ކަމަށެވެ.
ބޯޓުގެ ފުރަތަމަ ކަޅުފޮށި ނޮވެމްބަރު ތެރޭ ހޯދިފައިވާއިރު މިފަހަރު ފެނިފައިވަނީ އަޑު ރިކޯޑުކުރާ ވަސީލަތެކެވެ. މީގެއިން ބޯޓު ވެއްޓުމުގެ ކުރިން ޕައިލެޓާއި ކޯޕައިލެޓު އަދި އެއާޕޯޓް ގްރައުންޑު ކޮންޓްރޯލާއި ކުރި މުއާމަލާތްތައް އެނގިގެންދާނެއެވެ.