މިދިޔަ ޑިސެމްބަރު މަހު ފުލުހުން ހިންގި އޮޕަރޭޝަނެއްގައި ހަތް ކިލޯގެ މަސްތުވާތަކެއްޗާއެކު ހައްޔަރުކުރި ބޮޑީބިލްޑަރު ޝާހިން އިބްރާހިމް، ކްރިމިނަލް ކޯޓުން ދޫކޮށްލައިފިއެވެ.
ފުލުހުން ޝާހިން އިބްރާހިމްގެ ބަންދާ ގުޅޭގޮތުން ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެކޯޓުން އޭނާގެ ބަންދުގެ މުއްދަތު އިތުރުކުރުމަށް ނުފެންނަ ކަމަށް ބުނެ މިނިވަންކުރީ އޭގެ ފަހު ދުވަހު ކަމަށް ފުލުހުންނާ ހަވާލާދީ "ސަން" އިން ރިޕޯޓުކޮށްފައިވެއެވެ.
އޭނާ ބަންދުގައި ބަހައްޓަން ނުފެންނަ ކަމަށް ބުނެ ބަންދުން ދޫކޮށްލީ ކްރިމިނަލް ކޯޓުގެ ފަނޑިޔާރު އިބްރާހިމް އަލީއެވެ.
ބޮޑީބިލްޑިން އިން ރާއްޖެއަށް ރަން މެޑަލް ހޯދާފައިވާ ޝާހީން ހައްޔަރުކުރީ އޭނާ ދިރިއުޅޭ އެޕާޓްމެންޓު ބަލާ ފާސްކުރުމަށް ފަހުގައެވެ.
އޭނާ ބަންދުން ދޫކޮށްލާފައިވާއިރު މަރާލާފައިވާ މީހުންނާއި ގެއްލުވާލާފައިވާ މީހުންގެ ތަހުގީގު ހިންގުމަށް އުފައްދާފައިވާ ރިޔާސީ ކޮމިޝަނުގެ މެމްބަރު ހުސްނުއް ސުއޫދު ވަނީ ކްރިމިނަލް ކޯޓުގެ ފަނޑިޔާރުންނަށް ގޭންގުތަކުގެ ނުފޫޒު އޮންނަ ކަމަށް ތުހުމަތުކޮށްފައެވެ.