ހުޅުމާލޭގައި ރޭ ހިންގި މާރާމާރީއެއްގައި މީހަކަށް ތޫނު އެއްޗަކުން ހަމަލާދީ ޒަޚަމް ކޮށްލައިފިއެވެ.
ފުލުހުން މައުލޫމާތު ދީފައިވާ ގޮތުގައި މިމާރާމާރީގައި ޒަޚަމްވީ ޅ. ހިންނަވަރަށް ނިސްބަތްވާ އުމުރުން 28 އަހަރުގެ ފިރިހެނަކަށެވެ. މިހާދިސާ ހިނގާފައިވަނީ ސެންތްރޯ މޯލް ކައިރިން ކަމަށް ވެސް މައުލޫމާތު ލިބިފައިވެއެވެ.
ޒަޚަމްވި މީހާއަށް ހުޅުމާލެ ހޮސްޕިޓަލުން ފަރުވާ ދިނުމަށް ފަހު އިތުރު ފަރުވާއަށް، މާލެ އައިޖީއެމް ހޮސްޕިޓަލަށް ބަދަލުކުރިއެވެ. އޭނާގެ ބޮލަށް ޒަޚަމްތަކެއް ލިބުމުން ސީޓީ ސްކޭނެއް ހެދުމަށް އައިޖީއެމްއެޗަށް ބަދަލުކުރީ ކަމަށް ހުޅުމާލެ ހޮސްޕިޓަލުން ބުނެފައިވެއެވެ.
މީގެ އިތުރުން ވެސް ހުޅުމާލޭގައި ޒުވާނަކު ދުއްވާފައި ދިޔަ ސައިކަލަކަށް އެހެން ސައިކަލަކުން އައި ބަޔަކު ހަމަލާ ދިނުމުން، އެތާ ޕާކުކޮށްފައި އޮތް ކާރެއްގައި ޖެހި އަނިޔާތަކެއް ލިބިފައިވެއެވެ. ފުލުހުން ބުނެފައިވަނީ މިމައްސަލަތައް ތަހުގީގު ކުރަމުން އަންނަކަމަށެވެ.